10 ліпеня біскуп Гродзенскі Аляксандр Кашкевіч наведаў удзельнікаў 26-й пешай пілігрымкі, якая ідзе з Гродна на ўрачыстасці ў дыяцэзіяльны санктуарый Маці Божай Каралевы нашых сем’яў у Тракелях (Гродзенская дыяцэзія, Радунскі дэканат).
Як паведаміла Прэс-служба Гродзенскай дыяцэзіі, у гэты спякотны чацвёрты дзень дарогі іерарх пачаставаў пілігрымаў марозівам. Такі пачастунак удзельнікі пілігрымкі Гродна – Тракелі атрымалі ад біскупа і ў мінулым годзе.
Таксама пастыр Касцёла на Гродзеншчыне паразмаўляў з пілігрымамі, падзякаваўшы ім за сведчанне веры, якое яны даюць, ідучы праз гарады і вёскі.
Раней, калі пілігрымка выходзіла з Гродна, ён асабіста благаславіў іх.
У гэты ж дзень да пілігрымаў далучыўся каад’ютар Гродзенскай дыяцэзіі біскуп Уладзімір Гуляй. Ён цэлебраваў для іх ранішнюю Імшу, а пасля прайшоў разам з імі больш за дзесяць кіламетраў.
