Раніцай 7 ліпеня з Гродна на ўрачыстасці ў дыяцэзіяльны санктуарый Каралевы нашых сем’яў у Тракелях (Радунскі дэканат) вырушыла 26-я пешая пілігрымка.
Як паведаміла Прэс-служба Гродзенскай дыяцэзіі, у вандроўку да Маці Божай адправіліся каля 250-і пілігрымаў.
Перад выхадам пілігрымкі ў парафіі Найсвяцейшага Адкупіцеля адбылася святая Імша, цэлебрацыю якой узначаліў біскуп Гродзенскі Аляксандр Кашкевіч.
Гамілію прамовіў кіраўнік пілігрымкі ксёндз канонік Антоні Грэмза. Святар назваў пілігрымку асаблівым часам і выйсцем з зоны камфорту, дадаўшы, што пасля такога выйсця пачынаецца сапраўднае жыццё чалавека.
Па словах ксяндза Антонія, пасля пілігрымкі чалавек змяняецца, калі адкрываецца на ласку. Нагадаў ён і пра тое, як важна мець жывыя адносіны з Богам; пра тое, што для чалавека «Бог не можа быць звычкай — да Яго немагчыма прызвычаіцца».
Святар адзначыў, што пілігрымка асацыюецца з радасцю, супакоем, надзеяй, а з іншага боку — са стомленасцю і мазалямі, а таксама з Найсвяцейшай Паннай Марыяй.
«Марыя, наша Каралева, маліся за нас і вядзі да неба», — з такім малітоўным заклікам звярнуўся кіраўнік пілігрымкі да Маці Божай.
Напрыканцы Імшы біскуп Аляксандр Кашкевіч удзяліў благаслаўленне тым, хто вырушыў у гэты шасцідзённы шлях, і сам праводзіў пілігрымаў па вуліцах Гродна.
Маршрут пілігрымкі, які будзе праходзіць праз лясы і палі, вёскі і гарады, наступны: Гродна – Парэчча – Новы Двор – Забалаць – Радунь – Жырмуны – Тракелі.
У межах сёлетніх урачыстасцяў у дыяцэзіяльным санктуарыі ў Тракелях, дэвіз якіх «Марыя — наша Каралева», будзе будзе адзначацца 15-годдзе з часу каранацыі цудадзейнага Тракельскага абраза.
5 ліпеня 2009 года тагачасны арцыбіскуп Мітрапаліт Мінска-Магілёўскі кардынал Казімір Свёнтэк усклаў на ікону Маці Божай Тракельскай папскія кароны.
