На працягу актавы ўрачыстасці Божага Цела ў розных мясцінах адбываюцца Эўхарыстычныя працэсіі. У Іўі (Гродзенская дыяцэзія) працэсія прайшла ў нядзелю 2 чэрвеня.
У дзень шэсця з Найсвяцейшым Сакрамэнтам вуліцы райцэнтра па традыцыі становяцца арт-пляцоўкай незвычайнай формы сакральнага мастацтва: прыгожых, але, на жаль, недаўгавечных дываноў з кветак.
Пялёсткі кветак, сабраныя ў непаўторныя яскравыя дываны, з’яўляюцца данінай, якую жыхары горада прысвячаюць Езусу, прысутнаму ў Найсвяцэйшым Сакрамэнце.
Падрыхтоўка такой прыгажосці патрабуе таленту, сіл і фантазіі. Для таго, каб аформіць такія дываны, найчасцей выкарыстоўваюць васількі, бэз, ружы, рамонкі, а таксама лісце папараці, мох, кару альбо звычайную скошаную траву.
Дарэчы, сёлета самымі папулярнымі кветкамі былі півоні і лубін: менавіта іх пераважна выкарыстоўвалі для дывановых узораў.
Стваральнікамі дываноў сталі ўдзельнікі касцёльных рухаў «Легіён Марыі» і «Маці ў малітве», якія дзейнічаюць пры івейскай парафіі, міністранты і жыхары аднаго з мікрараёнаў горада, а таксама бацькі дзяцей, якія сёлета прынялі Першую Камунію. Для гэтых дзетак працэсіяй закончыўся «белы тыдзень».
Працэс стварэння кветкавых дываноў пачынаецца загадзя. На пачатку тыдня людзі збіраюцца, каб абмеркаваць дызайн алтароў і дываноў, падзяліцца думкамі на гэты конт. Потым наступае працэс збору матэрыялу для творчасці.
У суботу напярэдадні збіраецца каркас алтароў і падрыхтоўваецца зеляніна для дываноў, а раніцай нядзелі ўся гэтая прыгажосць з’яўляецца на цэнтральнай плошчы горада. Трэба адзначыць, што стварэнне алтароў у Іўі распачалося а шостай гадзіне раніцы, і ўжо праз дзве гадзіны усё было гатова.
Адзін з прыпынкаў Эўхарыстычнай працэсіі адбываўся каля помніка ў гонар адзінства і сяброўства традыцыйных веравызнанняў Івейшчыны. Дыван перад гэтым алтаром стаў самым вялікім па памерах: 15 на 20 метраў.
Гэты алтар рыхтавалі сем’і, з якіх дзеці ў гэтым годзе прынялі Першую святую Камунію.
Алтар, які рыхтаваў «Легіён Марыі», упрыгожваў дыван з кветкавым ружанцам, а на алтары, створаным рукамі ўдзельніці малітоўнага руху «Маці ў малітве», былі складзены словы «Прыйдзі, Дух Святы». На іншых дыванах былі прадстаўлены розныя эўхарыстычныя сімвалы: келіх з вінаградам, сэрца, крыж, сонца і розныя ўзоры.
У падрыхтоўцы працэсіі ўзялі ўдзел амаль сотня чалавек, а ў самім шэсці з Найсвяцейшым Сакрамэнтам па вуліцах горада прайшлі каля тысячы вернікаў.
