7 мая біскуп Кшыштаф Задарка сустрэўся з душпастырамі іншаземцаў, якія жывуць у Польшчы. На сустрэчы, якая адбылася ў будынку Сакратарыяту Канферэнцыі Епіскапату Польшчы (КЕП), прысутнічаў ксёндз Антоні Аблам, душпастыр беларусаў ва Уроцлаве.
Біскуп Задарка, адказны ў КЕП, між іншым, за мігрантаў, запрасіў душпастыраў супольнасцяў, каб абмеркаваць бягучыя справы.
На пачатку сустрэчы іерарх выказаў агульную занепакоеннасць польскіх біскупаў такой вялікай колькасцю мігрантаў, якія прыбываюць у Польшчу, і вынікаючым з гэтага недахопам святароў, якія маглі б ім служыць на іх родных мовах.
Асабіста адказны за мігрантаў біскуп занепакоены пытаннем легалізацыі святароў. Ён запэўніў, што ўвесь час назірае за сітуацыяй са святарамі-іншаземцамі, каб ведаць бягучую сітуацыю з іх дакументамі, якія дазваляюць выконваць душпастырскую паслугу акрэсленай групе вернікаў, а таксама з дакументамі, на падставе якіх яны могуць легальга знаходзіцца ў Польшчы, і аказвае ўсю магчымую дапамогу са свайго боку.
Кожны з прысутных душпастыраў распавёў пра сваю супольнасць, пра выклікі, якія перад імі стаяць, пра праблемы і планы на будучыню.
Пасля аповеду ксяндза Антонія Аблама біскуп зазначыў, што знаходзіцца ў кантакце з беларусамі, якія жывуць у Польшчы, і сустракаецца з імі.
Таксама на сустрэчы быў прэзентаваны праект катэхез для дарослых, які падрыхтавалі тэолагі з Блізкага Усходу і Азіі.
Напрыканцы сустрэчы іерарх падзякаваў прысутным святарам за служэнне, запэўніў у падтрымцы і дапамозе, а таксама выказаў надзею сустрэцца з імі і іх супольнасцямі на святкаванні Сусветнага дня мігрантаў і бежанцаў, што ў Касцёле адзначаецца ў апошнюю нядзелю верасня. Біскуп Кшыштаф Задарка прыгадаў пра адзначэнне гэтага дня ў межах Юбілею Святога 2025 года, на які 5 кастрычніка ў Ватыкан з’едуцца душпастыры з усяго свету.
