30 кастрычніка арцыбіскуп Мітрапаліт Уроцлаўскі Юзаф Купны прызначыў ксяндза Антонія Аблама душпастырам для іншаземцаў, якія размаўляюць на беларускай мове.
У лісце, скіраваным да ксяндза Антонія, іерарх адзначае, што «Кодэкс Кананічнага Права (гл кан. 383 § 1) абавязвае дыяцэзіяльнага біскупа, каб ён клапаціўся пра ўсіх вернікаў, даручаных яго апецы, незалежна ад узросту, становішча і нацыянальнасці, як пра пастаянных жыхароў, так і пра тых, хто часова знаходзіцца на яго тэрыторыі». З гэтай прычыны арцыбіскуп Купны надзяліў ксяндза Антонія ўсімі паўнамоцтвамі паводле канону 566, у тым ліку правам благаслаўлення сужэнстваў.
Супольнасць беларусаў-католікаў Уроцлава існуе з мая 2021 года. Вернікі збіраюцца на нядзельную Імшу і інтэграцыйную сустрэчу двойчы ў месяц. Таксама ладзяцца іншыя супольныя мерапрыемствы і акцыі.
Супольнасць беларусаў-католікаў Уроцлава дзейнічае пры парафіі святога Юрыя, мучаніка, і Узвышэння Святога Крыжа па адрасе: Biegła, 3.
Ксёндз Антоній Аблам — сын беларускай зямлі, паходзіць з парафіі святога Андрэя Апостала ў Нарачы (Мінска-Магілёўская архідыяцэзія). У 2006 годзе прыняў святарскае пасвячэнне, цяпер піша доктарскую працу па кананічным праве.
