13 красавіка ў катэдральным касцёле Найсвяцейшага Імя Марыі ў Мінску адбылася святая Імша падзякі з нагоды 33-годдзя з часу заснавання Мінска-Магілёўскай архідыяцэзіі.
Цэлебрацыю ўзначаліў арцыбіскуп Юзаф Станеўскі — трэці Мітрапаліт на гэтай катэдры. Разам з іерархам маліліся прадстаўнікі мінскага катэдральнага капітула, кансэкраваныя асобы, вернікі, а таксама міністранты, якія ў гэты дзень удзельнічалі ў адмысловай сустрэчы.
Арцыбіскуп Станеўскі ў прывітальным слове на пачатку Эўхарыстыі ўзгадаў, што ён сам разам з прысутным ксяндзом канонікам Францішкам Рудзем, калі яны былі яшчэ семінарыстамі, чулі ў гродзенскай катэдры словы булы Святога Айца аб заснаванні Мінска-Магілёўскай архідыяцэзіі.
У прамоўленай гаміліі арцыпастыр растлумачыў паходжанне слова «дыяцэзія».
Ён нагадаў, што гэты тэрмін выкарыстоўваўся ў Рымскай імперыі ў якасці назвы адміністрацыйнай адзінкі і тлумачыўся як «кіраванне». Цяпер гэты тэрмін выкарыстоўваецца ў касцёльнай мове і азначае частку Божага народа, даручаную пастырскай апецы біскупа ў супрацоўніцтве з прэзбітэрыем.
Арцыбіскуп таксама зазначыў, што гадавіна з часу заснавання архідыяцэзіі з’яўляецца для яе вернікаў і іх пастыраў нагодай для праслаўлення Бога сваім жыццём.
«Усе, хто ўтварае Мінска-Магілёўскую архідыяцэзію, — біскупы, святары, кансэкраваныя асобы, свецкія вернікі, — запрошаныя да таго, каб быць прыкладам і натхненнем адзін для аднаго, каб быць адважнымі і вернымі носьбітамі Божага святла, праўды і любові», — падкрэсліў іерарх.
На заканчэнне Эўхарыстыі арцыбіскуп Юзаф Станеўскі з удзячнасцю ўзгадаў пра сваіх папярэднікаў на Мінска-Магілёўскай катэдры: кардынала Казіміра Свёнтка і арцыбіскупа эмэрыта Тадэвуша Кандрусевіча, якія прыклалі шмат намаганняў дзеля станаўлення і далейшага развіцця архідыяцэзіі. Прысутных у касцёле а таксама тых, хто далучыўся з дапамогай прамой трансляцыі, арцыпастыр заахвоціў быць сапраўднымі сведкамі веры.
