26 сакавіка, з нагоды набліжэння ўрачыстасці Уваскрасення Пана, у Гродне адбыўся абед для маламаёмных і людзей без пэўнага месца жыхарства.
Як паведамляе Прэс-служба Гродзенскай дыяцэзіі, абед, як і кожны год, прыгатавалі законніцы Кангрэгацыі Сясцёр Найсвяцейшай Сям’і з Назарэта (назарэтанкі) разам з валанцёрамі пры падтрымцы Дабрачыннага каталіцкага таварыства Caritas Гродзенскай дыяцэзіі.
Пасілак благаславіў біскуп Гродзенскі Аляксандр Кашкевіч.
Ганаровымі гасцямі абеду сталі віцэ-канцлер Гродзенскай курыі ксёндз канонік Антоній Грэмза і прадстаўнікі Цэнтра сацыяльнага абслугоўвання насельніцтва Ленінскага раёна горада Гродна.
Прысутныя разам прамовілі малітву, якой навучыў Езус Хрыстус. У ёй яны прасілі Бога найперш аб удзяленні кожнаму з іх неабходных ласкаў.
Біскуп Кашкевіч выказаў віншаванні з нагоды з надыходзячага свята Вялікадня.
Сабраныя цешыліся, атрымліваючы з рук біскупа велікодныя яйкі. Кожны атрымаў велікодны набор: бульбянае пюрэ, курыную шынку, паштэт, хлеб, агурок, фарбаваныя яйкі, салодкі набор і шкарпэткі.
Падобныя мерапрыемствы дапамагаюць маламаёмным і асобам без пэўнага месца жыхарства не страціць веру ў Бога і ў добрых людзей, паказваюць ім, што, хоць часта ад іх адварочваецца грамадства, яны заўсёды могуць знайсці месца ў сэрцы Бога і Касцёла.
