З 9 па 11 лютага ў рэкалекцыйным доме Бога Айца ў Росі (Гродзенская дыяцэзія, Ваўкавыскі дэканат) прайшла фармацыйная сустрэча настаяцельнiц беларускай правiнцыi Кангрэгацыі Сясцёр Найсвяцейшай Сям’і з Назарэта.
Супольнасці гэтай манаскай кангрэгацыі дзейнічаюць у многіх мясцінах на тэрыторыі нашай краіны, дзе сёстры выконваюць шмат адказных заданняў у служэнні мясцоваму Касцёлу.
Настаяцельніцы супольнасцяў назарэтанак на чале з правінцыйнай настаяцельніцай сястрой Філатэяй Ціхановіч CSFN сабраліся ў Росі перад пачаткам Вялікага посту для супольнай малітвы і абмеркавання актуальных спраў сваёй кангрэгацыі.
Як паведаміла Прэс-служба Гродзенскай дыяцэзіі, удзельніцы сустрэчы таксама скарысталіся магчымасцю індывідуальнай малітвы ў дыяцэзіяльным санктуарыі Пана Езуса Журботнага.
Падобныя сустрэчы назарэтанак праходзяць некалькі разоў на год. Падчас іх сёстры могуць духоўна ўмацавацца, паглыбіць сувязь са сваёй супольнасцю, абмеркаваць бягучыя справы i планы на будучыню.
