14 студзеня ў касцёле Спаслання Духа Святога ў Барысаве адбыўся калядны канцэрт літургічнага хора «Голас душы» з Мінска.
Перад канцэртным выступленнем літургічны хор «Голас душы» сваім спевам упрыгожыў нядзельную святую Імшу, якая адбывалася ў новазбудаванай святыні.
«Тое, што чалавек не можа выказаць проста словамі, ён выражае музыкай і сваім спевам», — сказаў, вітаючы сталічных гасцей, пробашч маладой барысаўскай парафіі ксёндз канонік Аляксей Раманчук.
Пасля Эўхарыстыі, цэлебрацыю якой узначаліў ксёндз канонік Уладзіслаў Завальнюк, які прычыніўся да стварэння хора «Голас душы», усе ахвотныя засталіся паслухаць калядны канцэрт духоўнай музыкі.
Пад кіраўніцтвам дырыжора касцёльнага калектыва Таццяны Гажэўскай-Пешак і з канферансам вядучай канцэрта Марыі Новікавай хор выканаў вядомыя калядныя спевы на беларускай і польскай мовах.
Літургічны хор «Голас душы» быў заснаваны ў 1989 годзе. Напачатку музычны калектыў быў жаночым: удзельніцамі хору ў пераважнай большасці з’яўляліся студэнткі розных навучальных устаноў Мінска. Сёння гэта змяшаны хор, большасць удзельнікаў якога маюць музычную адукацыю, а некаторыя з’яўляюцца прафесійнымі вакалістамі.
Літургічны хор «Голас душы» ўдзельнічаў у шматлікіх міжнародных конкурсах і шмат выступаў у Беларусі і за мяжой.
Улетку мінулага года хор спяваў для Папы Францішка падчас агульнай аудыенцыі на плошчы Святога Пятра ў Ватыкане.
