21 снежня ў межах дабрачыннай каляднай акцыі «Ад усёй душы» ў Хрысціянскім сацыяльным цэнтры ў Мінску адбылася аплаткавая сустрэча для пажылых, самотных людзей і асобаў з абмежаванымі магчымасцямі.
Як паведамляецца на сайце Дабрачыннай Мiсiі Добрага Самаранiна пад апекай Святой Уршулi Ледухоўскай Samaranin.by, у сустрэчы ўзялі ўдзел Упаўнаважаны па справах рэлігій і нацыянальнасцяў Аляксандр Румак, начальнік упраўлення ідэалагічнай работы, культуры і па справах моладзі Адміністрацыі Ленінскага раёна Тамара Байгот, дырэктар дома-інтэрната для пенсіянераў і інвалідаў Наталля Зычкова, дырэктар дабрачыннай арганізацыі «Ёсць справа» Вольга Дамінікевіч.
Дабрачынная місія Добрага Самараніна, пры якой дзейнічае Хрысціянскі сацыяльны цэнтр, заўжды стараецца не абмінуць увагаю людзей, якія маюць асаблівую патрэбу ў сацыяльнай актыўнасці.
Удзельнікі сустрэчы сабраліся, каб падзяліцца аплаткамі, паглядзець святочную праграму і павіншаваць адзін аднаго з надыходзячым Божым Нараджэннем.
