21 снежня ў Гродне адбылася традыцыйная аплаткавая сустрэча для бедных, бяздомных i маламаёмных напярэдадні святаў Божага Нараджэння. На сустрэчы, у якой узяў удзел біскуп Гродзенскаі Аляксандр Кашкевіч, сабралося больш за 100 чалавек.
Як паведаміла Прэс-служба Гродзенскай дыяцэзіі, на сустрэчы таксама прысутнічалі дырэктар дыяцэзіяльнага Дабрачыннага каталіцкага таварыства Caritas ксёндз Алег Пятрашка, віцэ-канцлер Гродзенскай курыі ксёндз канонік Антоній Грэмза, сёстры з законніцкай супольнасці Найсвяцейшай Сям’і з Назарэта (назарэтанкі), якія актыўна дапамагаюць бедным, а таксама пастар лютэранскай супольнасці Уладзімір Татарнікаў.
Спачатку прысутныя праспявалі калядкі, што дапамагло стварыць атмасферу Божага Нараджэння. Потым ксёндз Алег Пятрашка прывітаў удзельнікаў, нагадаў традыцыю дзялення аплаткай і яе сімволіку.
Пасля малітвы і благаслаўлення, удзеленага біскупам, прысутныя падзяліліся аплаткамі. Святары выказалі віншаванні ўдзельнікам сустрэчы.
Абед для сабраных, як кожны год, прыгатавалі сёстры назарэтанкі разам з валанцёрамі пры падтрымцы Caritas Гродзенскай дыяцэзіі. На абед былі прапанаваны суп, бульба, селядзец, салата з буракоў, хлеб і кампот з булкай.
Акрамя святочных сустрэч перад Божым Нараджэннем і Вялікаднем, для бедных штодня ладзяцца дармовыя абеды ў адмысловай сталоўцы. У людзей, якія маюць патрэбу ў вопратцы ці абутку, таксама ёсць магчымасць звярнуцца з просьбай аб дапамозе і атрымаць неабходнае.
