15 снежня ў салезіянскай парафіі Марыі Успамогі Хрысціянаў у Бараўлянах, што пад Мінскам (Мінска-Магілёўская архідыяцэзія), адбылася традыцыйная аплаткавая сустрэча для супрацоўнікаў службы аховы здароўя.
Разам з мясцовымі святарамі — ксяндзом Паўлам Шчарбіцкім SDB і ксяндзом Казімірам Шыдэлка SDB — на сустрэчы прысутнічаў ганаровы госць: Генеральны вікарый Мінска-Магілёўскай архідыяцэзіі біскуп Юрый Касабуцкі.
Распачалася сустрэча са святой Імшы, перад пачаткам якой да сабраных звярнуўся пробашч парафіі і адказны за душпастырства медыкаў ксёндз Казімір Шыдэлка SDB. Святар прывітаў біскупа і ўсіх прысутных і выказаў вялікую ўдзячнасць за жаданне прыняць удзел у перадкаляднай сустрэчы.
Ксёндз Казімір заўважыў, што Бараўляны з’яўляюцца месцам, дзе засяроджана шмат медыцынскіх установаў; месцам, адкуль да неба ўзносіцца вялікая колькасць малітваў аб аздараўленні, ацаленні і падтрымцы ў цяжкай хваробе.
Святар адзначыў, што медыкі першымі суправаджаюць людзей у гэтых цяжкасцях і іх праца заслугоўвае вялікай удзячнасці і павагі.
У прамоўленай гаміліі біскуп Касабуцкі падкрэсліў, што ў сучасным свеце свята Божага Нараджэння губляе сваё першапачатковае значэнне, бо набывае больш камерцыйны характар. «Але Адвэнт — гэта час посту, які неабходны, каб зрабіць нас крыху лепшымі. Таксама і час хваробы можна выкарыстаць для пераасэнсавання свайго жыцця. Калі хварээш, на шматлікія рэчы пачынаешь глядзець па-іншаму, перажываешь іх не так, як раней. І ў такіх сітуацыях нас заўсёды суправаджаюць супрацоўнікі медыцыны, іх працу сапраўды можна назваць гераічнай, — адзначыў іерарх. —
У працы лекараў, я магу смела сказаць, ёсць таксама дзеянне Духа Святога: гэта не залежыць ад таго, веруючы чалавек ці не, але пэўнае слова, якое злучаецца з пратаколам лячэння, яно можа даць палёгку. Гэта нібы голас Божы, які гучыць з вуснаў чалавека. Гэтая падтрымка, падбадзёрванне можа даць жаданне жыць, таму сёння хачу выказаць вялікую падзяку працаўнікам службы аховы здароўя, якія ёсць сярод нас», — такія словы ўдзячнасці біскуп Юрый Касабуцкі выказаў усім лекарам і тым, хто клапоціцца аб здароўі чалавечага цела.
Калі завяршылася Эўхарыстыя, усе перайшлі ў будынак парафіяльнага дома, дзе вернікі падзякавалі біскупу за час, які ён удзяліў ім, а таксама за супольную малітву падчас святой Імшы.
Пасля парафіяльны хор заспяваў традыцыйныя калядкі і адбылося традыцыйнае дзяленне аплаткай.
