18 кастрычніка, калі ў Каталіцкім Касцёле адзначаецца свята святога Лукі, евангеліста, апекуна дактароў і медыцынаскі работнікаў, Старшыня Канферэнцыі Каталіцкіх Біскупаў у Беларусі арцыбіскуп Юзаф Станеўскі, Мітрапаліт Мінска-Магілёўскі, віншуе ўсіх медыкаў нашай краіны з патранальным святам.
Паважаныя сёстры і браты ў белых халатах!
З нагоды свята святога Лукі, евангеліста, які сам быў лекарам і ўшаноўваецца хрысціянамі як апякун медыкаў, я кірую вам словы віншавання, шчырай удзячнасці і найлепшыя пажаданні. Ва ўсе часы людзям патрэбныя тыя, хто прысвяціў сябе справе ратавання здароўя і жыцця іншых. У дзень патранальнага свята медыцынскіх работнікаў я з удзячнасю і павагай скіроўваю свае думкі да ўсіх вас, шаноўныя ўрачы, медсёстры і медбраты, акушэркі, фельчары, фармацэўты, санітары і ўсе іншых супрацоўнікі бальніц, паліклінік і аптэк.
Сёння я ўзношу за вас свае малітвы ў Рыме, перад грабніцаю святога Паўла, верным і адданым супрацоўнікам якога быў святы Лука, а праз некалькі дзён разам з пілігрымамі з Мінска-Магілёўскай архідыяцэзіі таксама наведаю Падую, дзе ў базыліцы святой Юстыны спачываюць рэліквіі вашага нябеснага апекуна і заступніка.
Дарагія сёстры і браты ў белых халатах, па прыкладу Добрага Самараніна з прыпавесці Езуса Хрыста, якую перадае ў сваім Евангеллі святы Лука, вы кожны дзень самааддана ратуеце найкаштоўнейшы Божы дар — жыццё чалавека.
Вы аказваеце дапамогу ў надзвычайных сітуацыях, звязаных са здароўем, і несяце неацэнную дапамогу людзям, якія апынуліся ў цяжкім стане.
Немагчыма знайсці словы, каб выказаць павагу і ўдзячнасць за ваша самаахвярнае служэнне хворым і церпячым. Ратуючы жыццё іншых людзей, вы выконваеце сваю місію і сваё пакліканне, нярэдка рызыкуючы пры гэтым сваім уласным здароўем і жыццём. Шчыра жадаю вам дабрыні, удзячнасці і разумення пацыентаў, іх сем’яў, падтрымкі з боку валанцёраў.
Пры алтары Пана мы сёння молімся за ўсіх вас, просячы Божай дапамогі, ласкі цярплівай настойлівасці ў барацьбе з цялеснымі і душэўнымі немачамі людзей, а таксама неабходных сіл, каб клапаціцца пра хворага чалавека, які заўсёды мае сваю годнасць і правы.
Як пастыр Мінска-Магілёўскай архідыяцэзіі я таксама запрашаю ўсіх медыцынскіх работнікаў Міншчыны і Магілёўшчыны да ўдзелу ў душпастырстве супрацоўнікаў службы аховы здароўя, адказным за якое з’яўляецца ксёндз Андрэй Лысы, хрыстусовец, са сталічнай парафіі святога Яна Евангеліста і святога Максімільяна Марыі Кольбэ.
Дарагія медыкі Беларусі! Жадаю вам моцнага здароўя, задавальнення і шмат радасці пры выкананні гэтага высакароднага служэння.
Няхай святы Лука, апякун супрацоўнікаў службы аховы здароўя, выпрасіць для вас і для вашых сем’яў дапамогі ад Нябеснага Лекара — Езуса Хрыста. Няхай Маці Божая, якую мы ўшаноўваем як Аздараўленне хворых, апякуецца ўсёй нашай Радзімай і нашым народам.
Сёння я шчаслівы перадаць усім вам, дарагія браты і сёстры, апостальскае благаслаўленне Святога Айца Папы Льва XIV, з якім учора сустрэўся на асабістай аўдыенцыі ў Ватыкане.
Ваш брат і пацыент,
✠ Арцыбіскуп Юзаф Станеўскі
Мітрапаліт Мінска-Магілёўскі
Старшыня Канферэнцыі Каталіцкіх Біскупаў Беларусі
