18 кастрычніка ў Каталіцкім Касцёле адзначаецца ўспамін святога Лукі, евангеліста, у гонар якога названы Дзіцячы дабрачынны сацыяльна-рэабілітацыйны цэнтр у Ляскоўцы што пад Мінскам.
Святы Лука, які быў спадарожнікам святога апостала Паўла, напісаў трэцяе Евангелле і кнігу Дзеяў Апосталаў, таксама займаўся медыцынай, таму, акрамя іншага, лічыцца заступнікам лекараў.
Дзіцячы дабрачынны сацыяльна-рэабілітацыйны цэнтр святога Лукі, з’яўляецца флагманскім праектам Дабрачыннага каталіцкага таварыства Caritas Мінска-Магілёўскай архідыяцэзіі і дзейнічае з 2003 года.
Установа безкаштоўна размяшчае членаў сем’яў, якія прывезлі сваіх дзяцей ў Бараўляны на абследванне, лячэнне ці рэабілітацыю ў Рэспубліканскі навукова-практычны цэнтр дзіцячай анкалогіі, гематалогіі і імуналогіі. Дзеці з бацькамі паступаюць у цэнтр святога Лукі па скіраванні клінікі.
Акрамя прытулку людзі атрымліваюць у цэнтры і духоўную падтрымку.
Дырэктар дабрачыннага каталіцкага таварыства Caritas Мінска-Магілёўскай архідыяцэзіі брат Анатоль Ярошка OFMСap размаўляе і дзеліцца парадамі з членамі сем’яў, якія перажываюць часы выпрабавання веры, напоўненыя хваляваннямі, адчаем і шматлікімі пытаннямі. Таксама за духоўнай падтрымкай да супрацўнікаў Caritas звяртаюцца і іншыя бацькі, чые дзеці лечацца ў Бараўлянах.
Дабрачынная арганізацыя імкнецца адказваць на духоўныя патрэбы людзей: кожны панядзелак у невялічкай капліцы святога Лукі ў Ляскоўцы адбываецца цэлебрацыя святой Імшы, якую звычайна ўзначальвае брат Анатоль.
Праз заступніцтва святога апекуна цэнтра супрацоўнікі Сaritas узносяць да Божага трона малітвы, просячы аб ласцы здароўя для хлопчыкаў і дзяўчынак з дзіцячага цэнтра.
У літургіі таксама часта ўдзельчаюць і падапечныя цэнтра, бацькі з дзецьмі.
