14 снежня Мітрапаліт Мінска-Магілёўскі арцыбіскуп Юзаф Станеўскі абвясціў аб новых прызначэннях у архідыяцэзіі.
У гэты дзень у катэдральным касцёле Найсвяцейшага Імя Марыі ў Мінску праходзіла перадкалядная сустрэча духавенства і кансэкраваных асоб Мінска-Магілёўскай архідыяцэзіі. Пасля святой Імшы, цэлебрацыю якой у галоўнай святыні архідыяцэзіі ўзначаліў Апостальскі нунцый у Беларусі арцыбіскуп Антэ Ёзіч, і перад традыцыйным дзяленнем аплаткай адбылася арганізацыйная частка сустрэчы. Падчас яе арцыбіскуп Станеўскі ўручыў дэкрэты аб новых прызначэннях.
Першым з іх арцыпастыр прызначыў сястру Чаславу Навіцкую з Кангрэгацыі сясцёр Уршулянак Сэрца Езуса Канаючага адказнай за душпастырства дзяцей у Мінска-Магілёўскай архідыяцэзіі.
Уручаючы дэкрэт сястры Чаславе, іерарх падкрэсліў важнасць душпастырскага клопату пра падрастаючае пакаленне. «Дзеці — гэта наша будучыня: гэта будучыня Касцёла, пра якую неабходна паклапаціцца ўжо цяпер», — заўважыў арцыбіскуп Юзаф Станеўскі. Ён пажадаў новапрызначанай адказнай поспехаў у гэтым няпростым служэнні, падмацаваўшы пажаданне пастырскім благаслаўленнем.
Сястра Часлава Навіцкая USJK з’яўляецца кіраўніцай заснаванай ёю Місіі Добрага Самараніна пад апекай святой Уршулі Ледухоўскай, пры якой у Мінску дзейнічае Хрысціянскі сацыяльны цэнтр. Галоўная задача Місіі — выхаванне і адукацыя падрастаючага пакалення на аснове хрысціянскіх каштоўнасцяў — ужо не першы год паспяхова рэалізуецца пад кіраўніцтвам сястры Чаславы.
