8 снежня, ва ўрачыстасць Беззаганнага Зачацця Найсвяцейшай Панны Марыі, у супольнасці Вышэйшай духоўнай семінарыі ў Гродне прайшоў дзень засяроджання.
Як паведамляе прэс-служба Гродзенскай дыяцэзіі, на сустрэчы семінарысты мелі магчымасць паразважаць над жыццём Маці Божай.
Дзень засяроджання распачаўся ўвечары 7 снежня ўрачыстымі Нешпарамі і ўводнай канферэнцыяй духоўнага айца семінарыі ксяндза Яна Сарэлы пра гісторыю ўзнікнення догмату аб Беззаганным Зачацці Марыі. Пасля надышоў час цішыні.
У дзень урачыстасці семінарыстаў чакала малітоўная праграма, якая садзейнічала таму, каб іх малітоўнае засяроджанне было плённым.
Дзень пачаўся Гадзінкамі аб Беззаганным Зачацці Найсвяцейшай Панны Марыі і медытацыяй над Божым словам.
Галоўным момантам дня засяроджання стала прысвячэнне Беззаганнаму Сэрцу Марыі, таксама была магчымасць аднавіць гэтае абяцанне.
Падчас Ружанца, наступнага пункту дня засяроджання, семінарыйная супольнасць малілася ў інтэнцыі ўсіх выпускнікоў гэтай навучальнай установы і за тых, хто ўжо адышоў у вечнасць.
Спецыяльна быў адведзены час для споведзі.
Пятніца, калі праходзіў дзень засяроджання, звычайна прызначана ў семінарыйным распарадку для больш глыбокага паяднання з Богам.
Пасля адарацыі Найсвяцейшага Сакрамэнту і абеду адбылася святая Імша. На Эўхарыстыі ўдзельнікі разважалі аб унутранай прыгажосці Маці Божай і аб тым, што толькі з Яе дапамогай можна назваць грэх грахом. Акрамя таго, духоўны айцец семінарыі нагадаў, што Панна Марыя з’яўляецца Апякункай гэтай установы.
Завяршыўся дзень засяроджання спевам Акафісту ў гонар Маці Божай у выкананні семінарыстаў.
