14 лістапада ў парафіі святога Міхала Арханёла ў Ашмянах адбыўся дзень засяроджання для духавенства і асоб кансэкраванага жыцця, якія служаць у Гродзенскай дыяцэзіі.
Пра гэта паведаміла Прэс-служба Гродзенскай дыяцэзіі.
У духоўных практыкаваннях удзельнічалі святары і законныя сёстры з чатырох дэканатаў Гродзенскай дыяцэзіі: Ашмянскага, Астравецкага, Івейскага і Смаргонскага.
Узначаліў сустрэчу біскуп Гродзенскі Аляксандр Кашкевіч.
Прысутныя святары выслухалі канферэнцыю «Літургія — крыніца ўсялякіх ласкаў і дароў Духа Святога», якую прамовіў пробашч гродзенскай катэдральнай парафіі святога Францішка Ксаверыя ксёндз канонік Ян Кучынскі.
Канферэнцыю для кансэкраваных асоб, прысвечаную манаскай вернасці, прамовіў пробашч парафіі Адведзінаў Найсвяцейшай Панны Марыі ў Гудагаі (Астравецкі дэканат) айцец Аркадзь Куляха OCD.
Кульмінацыяй сустрэчы стала святая Імша, цэлебрацыю якой узначаліў біскуп Кашкевіч.
На пачатку Літургіі іерарх заахвоціў усіх прысутных далучыцца да малітвы ў інтэнцыі памерлага ксяндза каноніка Здзіслава Вэдэра, салезіяніна, руплівага душпастыра.
Святар, які шмат гадоў служыў на Смаргоншчыне, адышоў да Пана 11 лістапада на 87-м годзе жыцця.
У гаміліі пробашч ашмянскай парафіі ксёндз канонік Ян Пузына з нагоды набліжэння ўрачыстасці Найсвяцейшай Панны Марыі Вастрабрамскай, Маці Міласэрнасці, якая з’яўляецца галоўнай Апякункай Касцёла на Гродзеншчыне, казаў пра жывы культ Маці Божай у мясцовым Касцёле.
Святар найперш заахвоціў, каб усе парафіі дыяцэзіі духоўна падрыхтаваліся да каранацыі абраза Маці Божай Суцяшальніцы Засмучаных у Барунах.
Падзея, згодна з рашэннем біскупа Гродзенскага, запланавана на восень наступнага года.
Напрыканцы Эўхарыстыі біскуп Аляксандр Кашкевіч падзякаваў святарам і законным сёстрам за сустрэчу, на якой яны мелі магчымасць умацавацца ў веры і любові да Бога і тых людзей, якім служаць кожны дзень.
