16 снежня ў парафіі святога Міхала Арханёла ў Ашмянах адбылася аплаткавая сустрэча духавенства і кансэкраваных асобаў, якія служаць пераважна ў парафіях паўночнай часткі Гродзенскай дыяцэзіі.
Як паведаміла Прэс-служба Гродзенскай дыяцэзіі, у сустрэчы, якую ўзначаліў біскуп Гродзенскі Уладзімір Гуляй, узялі ўдзел каля 30-і святароў.
Прысутныя выслухалі аскетычную канферэнцыю «Пакліканыя да любові на падставе энцыклікі Dilexit nos Папы Францішка», з якой выступіў духоўны айцец святароў дыяцэзіі ксёндз Анджэй Шчупал CSsR. Таксама быў час для адарацыі Найсвяцейшага Сакрамэнту і магчымасць прыступіць да споведзі.
Біскуп Уладзімір Гуляй, які сёлета ўпершыню ўдзельнічае ў гэтых сустрэчах у якасці пастыра дыяцэзіі, падзякаваў духавенству за руплівае служэнне ў сваіх парафіяльных супольнасцях, асабліва ў перыяд Адвэнту, які папярэднічае святам Божага Нараджэння.
Пастыр Грождзеннскай дыяцэзіі заахвоціў духоўных асобаў быць сапраўднымі сведкамі веры ў тых месцах, куды яны былі пасланыя, а таксама пажадаў, каб сустрэча з нованароджаным Езусам напаўняла ўсіх супакоем і радасцю.
Завяршэннем сустрэчы сталі дзяленне аплаткай і супольны абед.
