З 12 лістапада ў Віцебску распачалося святкаванне юбілею 25-годдзя з часу заснавання Віцебскай дыяцэзіі.
Як нагадвае Catholicnews.by, у гэты дзень адзначалася таксама 400-годдзе з часу мучаніцкай смерці святога апекуна самай маладой дыяцэзіі Касцёла на Беларусі — святога арцыбіскупа Полацкага Язафата Кунцэвіча. Святкаванне юбілею распачалося ўрачыстай святой Імшой у катэдральным касцёле Езуса Міласэрнага, цэлебрацыю якой узначаліў біскуп Віцебскі Алег Буткевіч. Пасля Эўхарыстыі адбылося падвядзенне вынікаў літаратурна-мастацкага конкурса «(Не)вядомы заступнік».
На наступны дзень у катэдральнай святыні сабраліся святары і кансэкраваныя асобы, якія нясуць служэнне ў Віцебскай дыяцэзіі, на сустрэчу са сваім біскупам.
Пробашч грэка-каталіцкай парафіі святога Язэпа ў Мінску протапрэзбітэр Андрэй Абламейка прамовіў канферэнцыю, у якой бліжэй пазнаёміў прысутных з асобай святога Язафата. Святар распавёў гісторыю атрымання з Вены рэліквіі ex indumentis святога біскупа і мучаніка — набедраніка. Гэтую частку ўбрання грэка-каталіцкага святара ў выглядзе парчовага прамавугольніка, якая носіцца на баку ніжэй пояса, перадаў спецыяльны пасланнік Папы Францішка арцыбіскуп Венскі кардынал Крыстаф Шонбарн падчас урачыстасцяў у Будславе ў 2016 годзе.
Святую Імшу ў межах пастырскай сустрэчы цэлебраваў біскуп Буткевіч разам са святарамі дыяцэзіі і прысутнымі грэка-каталіцкімі сабратамі з Віцебска і Мінска.
«400 гадоў таму 12 і 13 лістапада былі нядзеляй і панядзелкам адпаведна, як і цяпер.
У нядзелю, калі было ўчынена забойства, ні ў цэрквах, ані ў касцёлах не адбылася святая Імша, не гучалі званы, якія пазней былі знятыя, а Віцебск пазбаўлены Магдэбургскага права. А панядзелак стаў такім „днём працверазення“, калі людзі пачалі асэнсоўваць, што сталася. Вядома, што пазней адбыўся працэс, паляцелі галовы, і тыя віноўнікі забойства, хто быў асуджаны на смерць, акрамя аднаго, прынялі ўніяцтва», — падкрэсліў біскуп.
Для пошуку адзінства хрысціянаў іерарх прапанаваў святарам наследаваць прыклад святога Язафата.
Падчас арганізацыйнай часткі пастырскай сустрэчы былі прадстаўлены анонсы запланаваных на бліжэйшыя месяцы мерапрыемстваў у межах святкавання юбілею:
- 25 лістапада – сустрэча моладзі ў Полацку
- 14 снежня – аплаткавая сустрэча духавенства ў Наваполацку
- 4 студзеня – конкурс каляднай песні «Зорка Бэтлеема» ў Мёрах
- 5 студзеня – конкурс батлеек у Віцебску
З нагоды святкавання юбілею 25-годдзя з часу заснавання Віцебскай дыяцэзіі, якое будзе працягвацца да 1 снежня 2024 года, біскуп Алег Буткевіч аб’явіў аб вызначэнні пяці юбілейных святыняў і магчымасці атрымання поўнага адпусту:
- катэдральны касцёл Езуса Міласэрнага ў Віцебску,
- касцёл Нараджэння Найсвяцейшай Панны Марыі ў Браславе — дыяцэзіяльны Санктуарый Маці Божай Браслаўскай,
- касцёл святога Андрэя Баболі ў Полацку,
- касцёл Найсвяцейшай Тройцы ў Глыбокім,
- касцёл святога Антонія Падуанскага ў Паставах.
Пробашчам парафій гэтых касцёлаў былі ўручаны адмысловыя памятныя дошкі, якія будуць размешчаны на бачным месцы, каб кожны, хто ўваходзіць у святыню, ведаў, што на бліжэйшы год тут дзейнічае асаблівы адпустовы прывілей.
Для атрымання поўнага адпусту неабходна выканаць наступныя ўмовы:
- прыступіць да сакраманту споведзі
- прыняць святую Камунію
- памаліцца ў інтэнцыях Святога Айца, якая павінна ўключаць у сябе Апостальскі Сімвал Веры
- наведаць з пілігрымкай юбілейныя касцёлы ў Віцебскай дыяцэзіі і там пабожна ўзяць удзел у юбілейных урачыстасцях ці прынамсі правесці там адпаведны час у малітве або пабожных разважаннях, якія завершацца Малітвай Панскай (Ойча наш), Сімвалам веры і заклікамі да Найсвяцейшай Панны Марыі.
Пажылыя, нямоглыя, вязні і ўсе, хто па сур’ёзных прычынах не можа выйсці з дому, змогуць атрымаць поўны адпуст, не маючы ніякай прывязанасці да граху, маючы намер выправіцца як мага хутчэй, выканаць тры звычайныя згаданыя вышэй умовы, і духоўна далучыцца да юбілейных святкаванняў, ахвяруючы міласэрнаму Богу ўласны боль ці нязручнасці жыцця.
