3 лістапада, у актаву малітваў за памерлых, у катэдральнай базыліцы святога Францішка Ксавэрыя ў Гродне адбылася Эўхарыстыя ў інтэнцыі спачылага духавенства Гродзенскай дыяцэзіі.
Як паведамляе Прэс-служба Гродзенскай дыяцэзіі, на святой Імшы сабраліся канонікі катэдральнага капітулу Унебаўзяцця Найсвяцейшай Панны Марыі і святога Казіміра, іншыя святары, сёстры законныя і вернікі, якія сваёй малітвай хацелі выказаць удзячнасць за дабро, спазнанае ў жыцці ад духоўных асобаў.
Літургію ўзначаліў арцыбіскуп эмэрыт Тадэвуш Кандрусевіч, канцэлебравалі яе біскуп Гродзенскі Аляксандр Кашкевіч i прэзбітэры.
Пастыр Гродзенскай дыяцэзіі прывітаў усіх прысутных і падкрэсліў, што наша малітва — найцудоўнейшы выраз клопату аб памерлых, якіх мы даручаем Божай Міласэрнасці, і сярод якіх таксама святары, што ўдзялялі сакрамэнты і былі слугамі алтара.
З гаміліяй да прысутных звярнуўся віцэ-канцлер біскупскай курыі ў Гродне ксёндз канонік Антоній Грэмза.
Душпастыр заахвоціў вернікаў спадарожнічаць сваім святарам малітвай, каб іх штодзённае служэнне было плённым, а таксама памятаць пра тых, якія пераступілі парог вечнасці.
Ксёндз Антоній нагадаў, што за апошні час з шэрагаў прэзбітэрыя Гродзенскай дыяцэзіі адышоў у вечнасць ксёндз прэлат Антоній Філіпчык, які шмат гадоў быў пробашчам парафіі святога Вацлава ў Ваўкавыску.
Ён таксама адзначыў, што сёлета адзначаецца 80-я гадавіна смерці святароў, якія служылі ў Гродне: капэлана сясцёр назарэтанак і прэфекта школ ксяндза Юстына Скакоўскага, вікарыя гродзенскай Фары ксяндза Казіміра Шыпілы, гвардыяна гродзенскага францішканскага кляштара айца Дыянізія Клімчака. Яны прынялі мучаніцкую смерць з рук гітлераўцаў падчас Другой сусветнай вайны на Фартах у Навумавічах непадалёк ад горада над Нёманам.
У канцы Эўхарыстыі арцыбіскуп Тадэвуш, які ведаў многіх душпастыраў Гродзеншчыны, адзначыў, што сваім руплівым служэннем яны зрабілі вялікі ўнёсак у адраджэнне Каталіцкага Касцёла на Беларусі.
Іерарх пажадаў, каб памяць пра гэтых святароў, апосталаў нашых часоў, якія неслі служэнне ў цяжкія для абвяшчэння Евангелля акалічнасцях, ніколі не згасала ў верніках.
