Больш за мільён дзяцей сёлета ўзялі ўдзел у міжнароднай малітоўнай акцыі «Мільён дзяцей моліцца на ружанцы», якая традыцыйна прайшла 18 кастрычніка.
«Мільён дзяцей моліцца на Ружанцы» — сусветная ініцыятыва, арганізаваная Папскім фондам «Дапамога Касцёлу ў патрэбе». Галоўная мэта гэтай малітоўнай кампаніі — паказаць, што даверлівая малітва дзяцей можа ўзносіцца проста да Бога і такім чынам змяняць свет. У ружанцовая малітве дзеці разам прасілі аб супакоі і згодзе ў іх сем’ях, народзе і ва ўсім свеце.
Ініцыятары міжнароднай малітоўнай акцыі паінфармавалі, што сёлета яна ўпершыню аб’яднала больш за мільён дзяцей са 124-х краін, у тым ліку і з Беларусі.
У Папскім фондзе «Дапамога Касцёлу ў патрэбе» паведамілі, што да супольнай ружанцовай малітвы далучыліся таксама дзеці з рэгіёнаў, дзе шалее насілле і адбываюцца ўзброеныя канфлікты: з Ізраіля, Індыі, Нігерыі, Нікарагуа, Пакістана, Палестыны і Украіны.
У Беларусі акцыя «Мільён дзяцей моліцца на ружанцы» сёлета злучыла тэлемостам пяць гарадоў з усіх дыяцэзій нашай краіны. У супольнай малітве бралі ўдзел дзеці ў Браславе, Гомелі, Гродне, Магілёве і Мінску.
