30 верасня апоўдні ў пабэрнардынскім касцёле Адшукання Святога Крыжа ў Гродне адбылася святая Імша для ўдзельнікаў сімпозіума, прысвечанага пастырскаму году свецкіх і Сіноду біскупаў пра сінадальнасць.
Пасля першай сесіі прадстаўнічага форуму, які праходзіць у Міждыяцэзіяльнай духоўнай семінарыі, удзельнікі сабраліся на святую Імшу ў найстарэйшай каталіцкай святыні горада над Нёманам.
Цэлебрацыю ўзначаліў Старшыня Канферэнцыі Каталіцкіх Біскупаў у Беларусі біскуп Віцебскі Алег Буткевіч.
Разам з ім маліліся біскуп Гродзенскі Аляксандр Кашкевіч, арцыбіскуп эмэрыт Тадэвуш Кандрусевіч, святары, кансэкраваныя асобы, семінарысты, навучэнцы беларускіх каталіцкіх навучальных устаноў, вернікі з Гродна і іншых мясцін.
Вітаючы напачатку ўдзельнікаў Эўхарыстыі ў літургічны ўспамін святога Гераніма, святара і доктара Касцёла, Старшыня беларускага каталіцкага епіскапату нагадаў словы гэтага славутага перакладчыка Бібліі пра тое, што няведанне Святога Пісання азначае няведанне Хрыста.
Звяртаючыся перадусім да семінарыстаў і навучэнцаў беларускіх каталіцкіх навучальных устаноў, біскуп Буткевіч заахвоціў іх на пачатку навучальнага года старанна вывучаць тэалагічныя дысцыпліны, каб глыбей пазнаёміцца з Хрыстом, лепш разумець сваю веру і плённа абвяшчаць Евангелле ў сучасным свеце.
Божае слова падчас святой Імшы прамовіў арцыбіскуп Кандрусевіч. У сваёй гаміліі заслужаны іерарх перадусім падкрэсліў, што сучасны свет секулярызуецца і адначасова перажывае голад духоўнасці. Cекулярызацыя, паводле яго, гэта не адміранне хрысціянства, але Божы выклік, штуршок да яго лепшага пазнання, ачышчэння і паглыблення. Арцыпастыр дадаў, што новыя ўмовы жыцця і працы Касцёла нясуць з сабою новыя магчымасці і неабходнасць выплысці на глыбіню.
«Секулярнае грамадства, часткай якога мы з’яўляемся, — гэта тая сучасная Галілея, дзе трэба шукаць Езуса. Гэта заданне Касцёла, які складаецца не толькі з духавенства, але перадусім са свецкіх, на сучасным этапе яго развіцця», — заўважыў арцыпастыр, дадаўшы, што ўзаемадзеянне паміж духоўнымі і свецкімі — гэта задатак поспеху місіі Касцёла ў сучасным свеце.
«Духоўныя і свецкія не павінны лічыць адзін аднаго супернікамі, а супрацоўнікамі на ніве Пана дзеля збаўлення чалавека і вырашэння надзённых праблем. Бог для кожнага з нас вызначыў сваю місію, якую трэба прыняць з пакорай, не змяняючы Божага плану», — сказаў напрыканцы гаміліі арцыбіскуп Тадэвуш Кандрусевіч.
