20 верасня біскуп Гродзенскі Аляксандр Кашкевіч прызначыў пробашчам парафіі святога Вацлава ў Ваўкавыску ксяндза Марка Занеўскага, які да гэтага часу быў вікарыем парафіі Узвышэння Святога Крыжа ў Лідзе (Фара).
Пра новае прызначэнне паведаміла Прэс-служба Гродзенскай дыяцэзіі.
Ваўкавыская парафія заставалася без пробашча з моманту смерці шматгадовага душпастыра супольнасці ксяндза прэлата Антонія Філіпчыка, які адышоў у вечнасць 9 ліпеня.
Біскуп Кашкевіч падзякаваў ксяндзу Занеўскаму за святарскае служэнне, якое ён ажыццяўляў да гэтага часу, і ўдзяліў яму пастырскае благаслаўленне на спаўненне новых адказных абавязкаў.
Ксёндз Марэк Занеўскі нарадзіўся 1 студзеня 1983 года ў Гродне. Паходзіць з гродзенскай парафіі Найсвяцейшай Панны Марыі Вастрабрамскай, Маці Міласэрнасці (Аўгустовак).
Прэзбітэрскае пасвячэнне ўдзяліў яму 8 лістапада 2014 года біскуп Гродзенскі Аляксандр Кашкевіч у катэдральнай базыліцы святога Францішка Ксавэрыя ў Гродне.
