«Будаўніцтва святыні ў аграгарадку Верцялішкі»: у сеціве з’явіўся відэафільм пра касцёл Святой Сям’і ў Гродзенскай дыяцэзіі (дэканат Гродна-Усход).
Аўтар фільма — пробашч верцялішскай парафіі ксёндз Яўген Барысюк, аматар відэавытворчасці.
«У фільме мне хацелася паказаць не толькі працэс, але і тых, хто ўклаў у гэтую Божую справу сваю працу, пафесіяналізм, час і ахвяраванні. Гэты ролік я прысвячаю ім. Але яны вартыя большага. Дзякуй усім, хто дапамагаў нам. Памятаем у нашых малітвах»,
— выказаўся пробашч.
Парафія ў мястэчку Верцялішкі была заснавана ў 2006 годзе. Праз год распачалося будаўніцтва касцёла па ініцыятыве мясцовых католікаў, якія хацелі мець уласную святыню.
Фільм складаецца з архіўных відэа, у якіх можна ўбачыць усе этапы будаўніцтва.
Першапачаткова праект рыхтаваўся па прыкладзе касцёла ў Баранавічах (парафія святога Яна Паўла ІІ), але пазней у яго былі ўнесены змены. Касцёл вырашылі зрабіць даўжэйшым і вышэйшым, а сакрыстыі — крыху шырэйшымі. Праект падрыхтавала ААТ «Брэстжылпраект».
11 верасня 2022 біскуп Гродзенскі Аляксандр Кашкевіч здзейсніў пасвячэнне новага касцёла. 3 верасня 2023 года ў святыні ўрачыста сустрэлі рэліквіі благаслаўлёных сясцёр мучаніц з Навагрудка, малодшая з якіх, Барамэя, паходзіла з Верцялішак.
Мураваны касцёл у нэагатычным стыле размешчаны на вуліцы Ціміразева. Святыня аздоблена незвычайнымі элементамі.
Парэнчы на галоўным уваходзе зроблены ў выглядзе манахінь, якія нясуць розныя рэлігійныя рэчы.
Бочны алтар аздоблены цікавым абразом Маці Божай Сеўнай. У перспектыве, на даляглядзе, можна ўбачыць Верцялішкі, а менавіта касцёл і царкву.
Будоўля яшчэ не скончаная. Касцёл звонку і ўсярэдзіне яшчэ не да канца добраўпарадкаваны, таксама патрэбна плябанія з класам для катэхезы. На актуальны момант парафія чакае арган з Італіі.
