16 верасня арыбіскуп эмэрыт Тадэвуш Кандрусевіч здзейсніў абрад благаслаўлення крыжа ў капліцы кляштара меншых братоў капуцынаў, якія нясуць служэнне ў парафіі святога Францішка ў сталічнымм мікрараёне Новая Баравая (Мінска-Магілёўская архідыяцэзія).
Фігура ўкрыжаванага Хрыста, змешчаная ў капліцы братоў, была выканана італьянскім скульптарам Джузэпэ Бэрнардзі ў 2014 годзе.
Разблёнае Укрыжаванне з’яўляецца копіяй бронзавай скульптуры, якую стварыў вядомы італьянскі майстра П’етро Такка на пачатку XVII стагоддзя.
Да разьбяра звярнулася сямейная пара з просьбай зрабіць крыж, які яны меліся ўсталяваць ў інтэнцыі просьбы аб нараджэнні дзіцяці. Крыж з фігурай Хрыста быў узведзены ў маляўнічным месцы сярод альпійскай даліны ля падножжа гор. Праз некалькі гадоў стыхія разбурыла крыж, і Укрыжаванне развалілася на кавалкі. Разбітая фігура трапіла ў адну з італьянскіх майстэрняў і неўзабаве была заўважана там беларускім святаром. Пасля аднаўлення Укрыжаванне было змешчана ў капліцы мінскага кляштара братоў капуцынаў.
Арцыбіскуп Кандрусевіч таксама памаліўся аб супакоі для душы спачылага фотамастака Анатоля Клешчука, які адышоў у вечнасць 4 верасня. Гэта быў майстра рэпартажнай здымкі і тонкіх пейзажных замалёвак, асабліва любіў фатаграфаваць беларускія мястэчкі і людзей. У ягоных творах прасочваліся лёсы, пачуцці, думкі герояў: праз пранікнёныя позіркі, праз цень, пакінуты на сцяне, праз дробную дэталь жыцця простага чалавека. Асаблівай цікавасцю і болем у творчасці аўтара адгукнулася Чарнобыльская трагедыя.
Гэты сціплы чалавек з неверагодным творчым патэнцыялам, які з вялікай павагай і замілаваннем ставіўся да роднага краю і свайго народа, захаваў для нашчадкаў таксама частку гісторыі парафіі святога Францішка.
Вернікі з Новай Баравой і іх душпастыры асабліва ўдзячныя Анатолю Клешчуку за адмысловы фотарэпартаж з урачыстасці пасвячэння касцёла святога Францішка, якая адбылася 20 мая 2023 года.
На яго кадрах засталіся не толькі падзеі і асобы, але святлом і колерам таксама перададзена атмасфера таго незабыўнага для парафіяльнай супольнасці веснавога дня.
