15–16 верасня ў Дзіцячым сацыяльна-рэабілітацыйным цэнтры святога Лукі пры Caritas Minsk прайшоў трэнінг «Анлайн-навучанне, каб стаць практыкам MOVE. Міждысцыплінарная рухальная трэніроўка для людзей з абмежаванымі магчымасцям».
Каб павысіць сваю кваліфікацыю ў Ляскоўку прыехалі спецыялісты дзяржаўных карэкцыйных цэнтраў, якія працуюць з дзецьмі з абмежаванымі магчымасцямі. Некаторыя ўдзельнікі падключыліся анлайн. Усяго ўдзел у трэнінгу прынялі каля 30 чалавек.
Навучанне правялі замежныя спецыялісты: MOVE-трэнер, псіхатэрапеўт Элізабэт Рынгер-Нойман і MOVE-кансультант, мотапедагог Клаўдзія Пэн.
Абрэвіятура праграмы MOVE (Mobility Opportunities via Education) перакладаецца як «развіццё рухальных магчымасцей праз навучанне».
Асноўная мэта — дапамагчы людзям з інваліднасцю стаць больш незалежнымі ў штодзённых справах праз паляпшэнне асноўных функцыянальных навыкаў, напрыклад, такіх як сядзенне, стаянне, хаджэнне, перамяшчэнне з месца на месца.
Праграма была распрацавана ў 1970-х гадах Ліндай Бідабе, фізіятэрапеўтам, і з тых часоў была ўдасканалена і пашырана іншымі спецыялістамі ў гэтай галіне.
Заняткі прайшлі ў інтэнсіўным тэмпе — кожны дзень па 8 гадзін.
Спецыялісты вучыліся распазнаваць у падапечнага з інваліднасцю фізічны патэнцыял, ставіць перад ім простыя, бытавыя задачы і правільна дапамагаць ў развіцці патрэбных навыкаў для дасягнення пастаўленых мэтаў.
Шэраг перамог над уласным целам паспрыяе пашырэнню кола магчымасцяў для дзяцей з інваліднасцю весці максімальна поўнае і якаснае жыццё і быць актыўнай часткай грамадства.
