27 жніўня ў парафіі Божага Цела ў Нясвіжы (Мінска-Магілёўская архідыяцэзія) адбылося благаслаўленне школьнікаў і настаўнікаў, студэнтаў і выкладчыкаў, а таксама вучнёўскіх прылад.
Па ініцыятыве валанцёраў, з нагоды набліжэння новага навучальнага года да нясвіжскіх парафіянаў завітала… святая Моніка, успамін якой адзначаўся ў Касцёле ў гэты дзень.
Жанчына падзялілася з прысутнымі гісторыяй свайго мацярынскага жыцця і распавяла пра тое, як вельмі перажывала за свайго сына Аўгустына, калі бачыла, як той падчас вучобы ў Карфагене пачаў аддаляцца ад Хрыста.
Аднак Моніка не пакідала надзеі і, паўсюль следуючы за сынам, увесь час малілася за яго, пакуль Аўгустыну не адкрылася святло веры ў Збаўцу. Мацярынскае сэрца супакоілася, калі сын прыняў хрост, а пазней нават стаў біскупам.
Пасля сведчання святой Монікі пра моц малітвы прысутныя разам праславілі Нябеснага Айца малітвай «Ойча наш».
Пробашч парафіі і дэкан Нясвіжскі ксёндз Пётр Шарко і парафіяльны вікарый ксёндз Яўген Баланёў пажадалі ўсім вучням у новым навучальным годзе Божай дапамогі, поспехаў, цікавых адкрыццяў. Ксёндз Пётр падкрэсліў неабходнасць рэлігійнага выхавання словамі: «У целе павінен быць найперш здаровы дух».
Святая Моніка між тым параіла дзецям рэгулярна наведваць заняткі па катэхезе.
Многія дзеткі адгукнуліся на прапанову і запісаліся ў нядзельную школу. Цяпер справа бацькоў у тым, каб падтрымаць іх жаданне пазнаваць вучэнне Хрыста і ўзрастаць у веры.
Напрыканцы сустрэчы святая Моніка парадавала школьнікаў прыемнымі падарункамі.
Дзеці і іх бацькі вельмі ўдзячныя валанцёрам за цікавую і духоўна карысную ідэю.
