17 красавіка у цэнтры Caritas Мінска-Магілёўскай архідыяцэзіі ў Ляскоўцы, што пад Мінскам, адбылася чарговая сустрэча ў межах адукацыйнага праекту, скіраванага на ўзмацненне кампетэнцыі кансэкраваных асоб.
Красавіцкая сустрэча была перадапошняй у гэтым навучальным годзе, і на ёй ужо падводзіліся некаторыя вынікі працы каманд. Распачалося ўсё традыцыйна з малітвы, пасля якой каардынатар праекта ксёндз Віктар Гайдукевіч SDB звярнуўся да сабраных з прывітальным словам і анонсам заключнай сустрэчы, якая адбудзецца 15 мая.
У першай палове дня прайшлі навучальныя заняткі па курсе «Стратэгічнае кіраванне манаскай супольнасцю», якія правёў спікер Андрэй Каралёў.
Удзельнікі каманд па праектных кірунках: праца з моладдзю, праца з сем’ямі, прафесійнае душпастырства медыцынскіх работнікаў, работа са СМІ і катэхізацыя працягнулі працу над фармаваннем кампанентаў стратэгій праектных каманд, выяўленнем і сістэматызацыяй існуючых праблем, іх наступстваў і прычын узнікнення.
На аснове выкананага хатняга задання прыступілі да фармавання неабходнага набору кампетэнцый манаскіх асоб для паспяховага служэння ў праектных напрамках. Бягучыя вынікі працы каманд у гэтым навучальным годзе з іх прэзентацыяй будуць прадстаўлены на заключнай сустрэчы.
Пасля перапынку на абед адбылася другая частка сустрэчы, на якой у якасці спікера выступала сястра Вікторыя Чэкан.
Удзельнікі разам з сястрой працягнулі знаёмства з новай дысцыплінай — кіберпсіхалогіяй, і гэтым разам разважалі над псіхалагічнымі асаблівасцямі людзей лічбавай эпохі, так званымі digital native, і яе ўплывам на разуменне чалавечай ідэнтычнасці.
Акрамя таго, падчас сустрэчы размова ішла пра залежнасці, у тым ліку залежнасць ад інтэрнэта, якая сёння разглядаецца Дыягнастычным і статыстычным кіраўніцтвам па псіхічным расстройствам пятага выдання (DSMV) як расстройства, якое патрабуе далейшага вывучэння. Важным пытаннем стала таксама праблема прагляду парнаграфіі як форма залежнасці, таму ўдзельнікі пазнаёміліся з псіхадынамікай развіцця такога кшталту праблем і магчымасцямі дапамогі.
У перспектыве завяршэння першага года навучання ўдзельнікі мелі магчымасць інтэграваць атрыманыя веды ў агульную карціну, што стане таксама дапамогай у падрыхтоўцы заключнай сустрэчы, на якой удзельнікі прадставяць вынікі сваёй працы.
Заключная сустрэча з падвядзеннем вынікаў і прэзентацыяй гадавой працы каманд адбудзецца 15 мая. Удзел у ёй возьмуць таксама іерархі Каталіцкага Касцёла на Беларусі.
