Як жанчыны з радасцю беглі ад пустой магілы Езуса Хрыста, каб паведаміць Яго вучням пра цудоўнае ўваскрасенне, падобным чынам вернікі парафіі Божага Цела ў Нясвіжы (Мінска-Магілёўская архідыяцэзія) і валанцёры парафіяльнага Caritas у Велікодны панядзелак 10 красавіка занеслі радасць Уваскрослага Хрыста патрабуючым.
Наведаўшы разам з парафіянамі і валанцёрамі пастаяльцаў псіханеўралагічнага дома-інтэрната для састарэлых і інвалідаў у вёсцы Асмолава, пробашч парафіі ў Нясвіжы ксёндз канонік Пётр Шарко, дэкан Нясвіжскі, павіншаваў іх са святам Пасхі і перадаў неабходныя сродкі гігіены, а таксама святочныя пачастункі, якімі шчодра падзяліліся з патрабуючымі вернікі: фарбаваныя яйкі, булкі і кулічы, фрукты і цукеркі.
Не забыліся таксама падараваць вырабы ад дзяцей, якія на працягу Вялікага посту на майстар-класах старанна рыхтавалі паштоўкі і сувеніры.
Дзяліліся радасцю і святкавалі ўсе разам: валанцёры разам з жыхарамі дома-інтэрната і супрацоўнікамі ўстановы традыцыйна «мацаваліся» святочным яйкам, гулялі ў гульні, спявалі разам з хорам «Актывісты» і нават танчылі.
Кіраўніца хора і актыўная парафіянка Ірына Латушка сваім запалам і энергічнасцю дапамагла зрабіць свята па-сапраўднаму каляровым і па-сямейнаму ўтульным.
Ксёндз пробашч скіраваў велікодныя віншаванні таксама дырэктару дома-інтэрната і абмеркаваў з ім перспектывы далейшага супрацоўніцтва.
Пасля развітання з падапечнымі дома-інтэрната, вікарый нясвіжскай парафіі ксёндз Яўген Баланёў разам з валанцёрамі скіраваўся з велікоднымі віншаваннямі ў аддзяленне кругласутачнага знаходжання для пажылых і інвалідаў у вёсцы Лявонавічы, а таксама да пажылых і самотных парафіянаў, каб кожны атрымаў радасць дабра, цеплыні і адчуў, што Хрыстус сапраўды ўваскрос.
Гэтыя людзі, пражыўшы ўсё жыццё на Нясвіжчыне, хадзілі ў касцёл ад маленства, тут жа прымалі святыя сакрамэнты, узрасталі ў веры. Кожны з іх зрабіў свой каштоўны ўнёсак у тое, каб дзверы святыні заўсёды былі адчыненыя.
Варта адзначыць, што касцёл Божага Цела ў Нясвіжы на працягу свайго больш як 420-гадовага існавання ніколі не зачыняўся.
