З 4 па 25 жніўня валанцёры дабрачыннай суполкі Caritas парафіі Божага Цела ў Нясвіжы (Мінска-Магілёўская архідыяцэзія) правялі акцыю ў падтрымку шматдзетных сем’яў парафіянаў «Збяром дзяцей у школу разам».
Вернікі нясвіжскай парафіі актыўна ўключыліся ў акцыю: ахвяроўвалі грашовыя сродкі і канцылярскія прыналежнасці.
Ахвяраваныя школьныя прылады былі старанна запакаваныя ў падарункавыя пакеты, для якіх юны выхаванец каталіцкай школы Арцём Суслаў стварыў аўтарскі малюнак, а на сабраныя грашовыя сродкі былі набытыя сертыфікаты ў кнігарню.
Фінал акцыі адбыўся ў Дзень ведаў 1 верасня, калі кожная шматдзетная сям’я атрымала падарунак, а для маленькіх парафіянаў валанцёры Caritas правялі цікавыя інтэрактыўныя гульні, падчас якіх дзеткі актыўна адказвалі на пытанні і атрымлівалі падарункі.
Напрыканцы адбылося благаслаўленне школьнікаў і студэнтаў, а таксама настаўнікаў і выкладчыкаў на новы навучальны год, а пасля ўсіх удзельнікаў акцыі чакаў салодкі стол.
Усе, хто перад новым навучальным годам атрымаў неабходную дапамогу, удзячныя валанцёрам парафіяльнай суполкі Caritas за адкрытае сэрца, падрыхтоўку і рэалізацыю акцыі «Збяром дзяцей у школу разам», а таксама парафіянам за актыўны ўдзел у ёй.
