8 красавіка, у Вялікую суботу, Мітрапаліт Мінска-Магілёўскі арцыбіскуп Юзаф Станеўскі здзейсніў абрад благаслаўлення традыцыйных велікодных страваў.
Арцыпастыр наведаў парафію Маці Божай Ружанцовай і святога Дамініка ў Ракаве, дзе на пачатку сёлетняга Вялікага посту адышоў у вечнасць шматгадовы пробашч гэтай супольнасці ксёндз канонік Дзмітрый Барыла, а нядаўна быў прызначаны новы душпастыр, якім стаў ксёндз Дзмітрый Чупрын.
Сваёй прысутнасці і супольнай малітвай арцыбіскуп Станеўскі праявіў айцоўскі клопат пра ракаўскіх католікаў, а таксама ўмацаваў іх у веры ў несмяротнасць, задаткам якой стала ўваскрасенне Хрыста.
Вярнуўшыся з Ракава, іерарх благаславіў пасхальныя стравы ў архікатэдральным касцёле Найсвяцейшага Імя Марыі. Разам з сабранымі ў галоўнай святыні архідыяцэзіі шматлікімі вернікамі ён памаліўся перад сімвалічнай грабніцай Пана, пасля чаго здзейсніў абрад благаслаўлення страваў. Арцыпастыр звярнуўся да сабраных са словам, у якім заахвоціў вернікаў належным чынам перажыць урачыстасць Уваскрасення Езуса Хрыста.
«Мае дарагія, жадаю, каб, нягледзячы на штодзённыя клопаты і справы, заўважыць Хрыста і Яго Уваскрасенне; не абмяжоўвацца толькі велікодным кошычкам, але несці Уваскрослага ў свет: несці Яго сваім жыццём і добрым сведчаннем свайго хрысціянства.
Будзем памятаць, што дзверы касцёлаў адчынены не толькі сёння, але што Езус чакае нас кожную нядзелю», — выказаў свае велікодныя пажаданні арцыбіскуп Юзаф Станеўскі.
