На пачатку сакавіка ў Міждыяцэзіяльнай вышэйшай духоўнай семінарыі ў Гродне адбыліся велікапосныя рэкалекцыі.
Як са спасылкай на старонку семінарыі семінарыі ў сацыяльнай сетцы Instagram @vdsgrodna паведаміла 9 сакавіка Прэс-служба Гродзенскай дыяцэзіі, для семінарыстаў, якія рыхтуюцца да святарства, гэта быў асаблівы час, каб яшчэ раз задумацца над сваім жыццём, а найперш над сваёй верай.
Велікапосныя духоўныя практыкаванні для будучых святароў правёў ксёндз Юрый Жэгарын, пробашч парафіі святога Міхала Арханёла ў Навагрудку. Рэкалекцыяніст прывёў прыклады сведчанняў таго, як вера дапамагла знайсці выхад, здавалася б, у безвыходных з чалавечага пункту гледжання сітуацыях.
Святар падкрэсліў, што ўсялякія цяжкасці і перашкоды, якія сустракаюцца ў жыцці, не такія страшныя, калі перажываць іх з Богам: з Ім мы заўсёды знойдзем вырашэнне і надзею.
На заканчэнне духоўных практыкаванняў рэктар семінарыі ксёндз канонік Віталій Вайцяхоўскі падзякаваў рэкалекцыяністу за яго слова, адрасаванае ўдзельнікам духоўных практыкаванняў, а таксама за прыклад святарскай руплівасці.
