21 снежня ў Вышэйшай духоўнай семінарыі ў Гродне адбыўся вігілійны вечар. Перш, чым раз’ехацца святкаваць Божае Нараджэнне ў сваіх парафіяльных супольнасцях і сярод блізкіх, семінарысты сабраліся на традыцыйнай аплаткавай сустрэчы.
Як паведаміла Прэс-служба Гродзенскай дыяцэзіі, на ёй прысутнічала кіраўніцтва семінарыі, выкладчыкі, свецкія супрацоўнікі і тыя, хто працаваў у навучальнай установе раней. У ліку прысутных быў біскуп Гродзенскі Аляксандр Кашкевіч.
Сустрэча стала для ўдзельнікаў нагодай пабыць разам, падзяліцца аплаткамі і паспяваць калядкі ў гонар нараджэння Езуса.
Рэктар семінарыі ксёндз канонік Віталій Вайцяхоўскі ўзгадаў у сваім слове святой памяці ксяндза прэлата Ежы Лявінскага, якога сёлета ўжо не было за вігілійным сталом і які раней таксама заўсёды спяваў на такіх сустрэчах старыя калядкі.
На наступны дзень семінарысты вырушылі дадому. У святочны час яны будуць дапамагаць у служэнні ў сваіх родных парафіях.
