21 снежня, незадоўга да святаў Божага Нараджэння, у Гродне адбылася традыцыйная аплаткавая сустрэча для бедных, бяздомных i маламаёмных людзей.
Як паведаміла Прэс-служба Гродзенскай дыяцэзіі, на сустрэчу сабралося больш за 100 чалавек, якія жывуць у незадавальняючых умовах. У святочнай сустрэчы з малазабяспечанымі людзьмі ўзялі ўдзел біскуп Гродзенскі Аляксандр Кашкевіч, дырэктар гродзенскага Caritas ксёндз канонік Раман Рачко, прэс-сакратар Гродзенскай дыяцэзіі ксёндз канонік Юрый Марціновіч. Прысутнічаў таксама пастар лютэранскай супольнасці ў Гродне Уладзімір Татарнікаў.
Абед для ўдзельнікаў сустрэчы, як і кожны год, прыгатавалі законніцы Кангрэгацыі Сясцёр Найсвяцейшай Сям’і з Назарэта (назарэтанкі) разам з валанцёрамі пры падтрымцы Дабрачыннага каталіцкага таварыства Caritas Гродзенскай дыяцэзіі.
Усіх прывітаў ксёндз Раман Рачко, які растлумачыў традыцыю дзялення аплаткай і яе сімволіку. Святар падкрэсліў, што святы Божага Нараджэння заахвочваюць людзей быць добрымі адзін да аднаго і старацца дзяліцца любоўю.
Пастар Уладзімір Татарнікаў выказаў сабраным віншаванні, адзначыўшы, што святы заўсёды яднаюць людзей у адну сям’ю і нясуць неабходную надзею.
Трымаючы ў руках аплаткі, духавенства дзялілася імі з удзельнікамі сустрэчы, жадаючы міру і патрэбных дароў Пана Бога.
На абед удзельнікам былі прапанаваны фасолевы суп, бульба, а на дэсерт — пончык і кампот з сухафруктаў. Таксама яны атрымалі з сабой сімвалічныя прадуктовыя падарункі.
На заканчэнне біскуп Аляксандр Кашкевіч удзяліў усім прысутным пастырскае благаслаўленне, пажадаўшы надзеі на лепшае заўтра.
Штогод у перадсвяточны час Касцёл хоча паказаць такім людзям, што яны не пакінутыя, што заўсёды могуць атрымаць патрэбную падтрымку, бо, як падкрэслівае Святы Айцец Францішак, «любоў да бедных знаходзіцца ў цэнтры Евангелля».
