2 снежня, у пятніцу першага тыдня Адвэнту, Мітрапаліт Мінска-Магілёўскі арцыбіскуп Юзаф Станеўскі з пастырскім візітам наведаў некалькі парафій Стаўбскага дэканату.
Свой першы візіт на Стаўбцоўшчыну арцыпастыр здзейсніў у лістападзе мінулага года. Тады ён пазнаёміўся з духавенствам дэканату і разам з мясцовым дэканам, ксяндзом канонікам Ігарам Лашуком наведаў мясціны, звязаныя з жыццём славутага беларускага песняра Якуба Коласа.
Гэтым разам арцыбіскуп Станеўскі ў суправаджэнні ксяндза дэкана візітаваў парафіяльныя супольнасці ў вёсках Цеснавая, Хатава, Налібакі і Дзераўная.
Падчас візіту іерарх паразмаўляў з душпастырамі гэтых парафій, даведаўся аб іх рэлігійным жыцці, аб стане святынь і дакументацыі, аб духоўных і матэрыяльных (рамонты і г.д.) планах на будучыню.
У Год гістарычнай памяці арцыбіскуп Юзаф Станеўскі звярнуў асаблівую ўвагу на гісторыю парафій і святынь (фундатары, будаўніцтва, рэлігійнае жыццё), аб чым распавялі як пробашчы, так і вернікі, якія ўдзельнічалі ў сустрэчах з арцыпастырам.
