На пачатак Адвэнту, які сёлета распачынаецца 27 лістапада, Мітрапаліт Мінска-Магілёўскі арцыбіскуп Юзаф Станеўскі кіруе адмысловы ліст да дзяцей, у якім тлумачыць маленькім вернікам сэнс падрыхтоўкі да святаў Божага Нараджэння.
Дарагія дзеці,
наймілейшыя і наймалодшыя вернікі нашай архідыяцэзіі!
Пішу да вас свой першы ліст у той дзень, калі ў Касцёле распачынаецца новы літургічны перыяд — Адвэнт.
Усе вы ведаеце, што гэта час радаснай чатырохтыднёвай падрыхтоўкі да самага важнага дня нараджэння ў свеце — да святкавання народзінаў Пана Езуса — Божага Нараджэння.
Дарагія дзеці, кожны з вас ведае дату свайго дня нараджэння і, несумненна, прыгожа адзначае гэты дзень разам з самымі блізкімі людзьмі. Да вас прыходзяць госці: хросныя бацькі, дзядуля з бабуляй, сябры, аднакласнікі, і вы атрымліваеце падарункі, пра якія марылі.
Пан Езус таксама прагне гэтага ў Дзень свайго нараджэння. Ён чакае вас, мілыя дзеці, як сваіх найлепшых сяброў, і хацеў бы таксама атрымаць падарунак. Таму, дарагія мае, я заклікаю вас да сумеснага перажывання Адвэнту і святаў Божага Нараджэння, а таксама да падрыхтоўкі падарунка для Пана Езуса.
Падумаем, што найбольш узрадавала б Пана Езуса? Які падарунак Ён чакае ад нас? Ён прагне, каб мы падрыхтавалі Яму месца ў нашых сэрцах.
Як вядома, Езус нарадзіўся ў Бэтлееме. Стаў святлом, якое раз’ясняе цемру граху і зла. У Адвэнце кожны з вас можа стаць такім «бэтлеемскім агеньчыкам», які ўсім дорыць святло, цеплыню, спакой, добразычлівасць, радасць і любоў.
Як гэта ўчыніць? Заахвочваю вас, дарагія дзеці, каб вы зрабілі для сябе пастановы рабіць добрыя ўчынкі, якія, нібы маленькія агеньчыкі, асветляць нашую штодзённасць. Няхай кожны з вас выбера адну няпростую для сябе справу, якую будзе выконваць штодня, стараючыся не забываць пра яе. Напрыклад, няхай гэта будзе дапамога бацькам, добрыя адносіны да аднакласнікаў, стараннасць у вучобе, добрыя адзнакі, штодзённая малітва, або размова з Богам.
Дарагія! Вельмі заахвочваю вас наведваць касцёл, прыходзіць на нядзельную Эўхарыстыю і на Рараты — святыя Імшы на ўшанаванне Найсвяцейшай Панны Марыі, якая з з радасцю і любоўю чакала нараджэння свайго Сына Езуса Хрыста.
Для таго, каб вам было прасцей выконваць зробленую пастанову, заахвочваю вас весці «Адвэнтавы каляндар добрых учынкаў», адзначаючы ў ім чырвоным фламастарам або алоўкам — нібы маленькім агеньчыкам — свой унёсак у тое, каб зрабіць нашае атачэнне лепшым.
Няхай кожны з вас, дарагія дзеці, стане «адвэнтавым агеньчыкам», і дзякуючы вам свет будзе лепшым і прыгажэйшы, а Дзіцятка Езус у Дзень свайго нараджэння, несумненна, узрадуецца такому падарунку.
На ўсе вашыя адвэнтавыя пастановы і старанні ад усяго сэрца благаслаўляю ў імя Айца i Сына, i Духа Святога.
Ваш старэйшы сябра,
Арцыбіскуп Юзаф Станеўскі
Мітрапаліт Мінска-Магілёўскі
Мінск, 21 лістапада 2022 г., ва ўспамін Ахвяравання Найсвяцейшай Панны Марыі
