31-я Сусветныя дні моладзі ў Кракаве паступова ідуць да завяршэння. Суботні дзень у Кракаве нагадвае «перасяленне народаў»: сотні пілігрымаў крочаць у напрамку кампуса «Misericordiae», дзе ўвечары распачнецца моладзевае чуванне з удзелам Папы Францішка.
Многія нясуць з сабою спальнікі і карыматы, плануючы застацца на начным чуванні да раніцы. У іх ліку – і вялікая група пілігрымаў з Гродзенскай дыяцэзіі на чале з кс. Антоніем Грэмзам.
Перад выхадам у кампус, дзе адбудзецца чуванне, пілігрымы сабраліся на заключную святую Імшу для беларусаў у касцёле св. Максімільяна Кольбэ, якую ўзначаліў біскуп Віцебскі Алег Буткевіч.
Віцебскі ардынарый – адзін з шасці прадстаўнікоў епіскапату Беларусі, якія прымаюць удзел у Сусветных днях моладзі. У Кракаве знаходзяцца таксама арцыбіскуп Тадэвуш Кандрусевіч, біскуп Аляксандр Кашкевіч, біскуп Антоні Дзям’янка, біскуп Казімір Велікаселец і біскуп Юзаф Станеўскі.
Сваімі ўражаннямі ад СДМ некаторыя біскупы падзяліліся з Сatholic.by.
Удзел католікаў у СДМ – сведчанне адраджэння Касцёла ў Беларусі
Для біскупа Гродзенскага Аляксандра Кашкевіча СДМ у Кракаве – другія па ліку. У пачатку 1990-х гадоў іерарх удзельнічаў у СДМ у Чэнстахове.
Падчас сёлетняй сустрэчы моладзі гродзенскі ардынарый прымаў удзел у святой Імшы з Папам Францішкам у санктуарыі Божай Міласэрнасці ў Лагеўніках, а таксама на Яснай Гары, святая Імша на якой была прымеркавана да 1050-годдзя Хросту Польшчы.
«Гледзячы на шматлікіх пілігрымаў з розных кантынентаў, шчырых у сваёй радасці, я ўсвядоміў, наколькі цудоўным з’яўляецца час, які я магу назіраць – час, калі Божая міласэрнасць запаліла ўвесь свет», — адзначае іерарх.
«Хочацца, каб з СДМ беларуская моладзь узяла з сабою радасць і адкрытасць, давер – каб заўсёды была маладой у сваім сэрцы», — дадае біскуп.
Біскуп Віцебскі Алег Буткевіч, як і дапаможны біскуп Гродзенскай дыяцэзіі Юзаф Станеўскі, называе сустрэчу ў Кракаве першай у сваім святарскім жыцці.
«Я вельмі ўражаны колькасцю вернікаў, якія прыбылі сюды, — адзначае віцебскі ардынарый. — Вельмі цешыць, што шмат моладзі прыехала ў Кракаў з Беларусі. Гэта добры знак, які паказвае, што на нашай зямлі – так пацярпелай ад атэізму – моладзь з’яўляецца тым парасткам веры, які сведчыць пра адраджэнне Касцёла ў Беларусі».
Як прызнаецца біскуп Віцебскі, на СДМ у Кракаве пануе «вельмі прыязная атмасфера ўзаемапаразумення».
«Для Бога няма нічога немагчымага – хто ведае, магчыма, калі-небудзь СДМ могуць прайсці і ў Беларусі. Гэта залежыць ад Бога, ад нашага жадання і ад нашай малітвы», — заключае іерарх.
СДМ як духоўнае яднанне
Біскуп Юзаф Станеўскі ў каментарыі Сatholic.by адзначае, што, як адказны за працу з моладдзю пры Канферэнцыі Каталіцкіх Біскупаў у Беларусі, суправаджае моладзь з моманту адпраўлення адмысловага цягніка «Гродна-Кракаў»:
«Вельмі радасна перажываць тое ж, што перажываюць яны, – я быццам і сам станаўлюся маладым і бадзёрым. Маю надзею, што праз гэту весялосць моладзь не забываецца на малітву і руплівасць ва ўзрастанні веры і адданасці Касцёлу і Богу».
Гаворачы пра касцёл св. Максімільяна Кольбэ, які на час СДМ стаў «другім домам» для беларускай моладзі, біскуп адзначыў, што «на сустрэчу са Святым Айцом мы ідзём слядамі нашых святых» – як вядома, святы Максімільян Кольбэ пэўны час працаваў у Гродне.
«Добра, што СДМ існуюць, і важна, каб наша моладзь цаніла гэтую магчымасць духоўнага яднання з каталіцкай моладдзю ўсяго свету. На жаль, у часы маёй маладосці такіх сустрэч не было».
СДМ – пілігрымка веры і братэрства
Сапраўдным рэкардсменам па ўдзелу ў СДМ сярод членаў беларускага епіскапату з’яўляецца Мітрапаліт Мінска-Магілёўскі арцыбіскуп Тадэвуш Кандрусевіч, для якога гэта ўжо дзявятая сустрэча моладзі.
«Мяне вельмі цешыць, што такія СДМ праводзяцца, — прызнаецца іерарх. — Гэта не толькі сустрэча са Святым Айцом, але і сустрэча з аднагодкамі ўсяго свету. І ў гэтым перасячэнні сусветных культур, моў і традыцый і праяўляецца паўсюднасць Каталіцкага Касцёла».
Прыгадваючы выказванне св. Яна Паўла ІІ пра тое, што «моладзь – гэта надзея для свету», арцыбіскуп адзначае, што як душпастыр заўсёды хацеў бы мець гэтую надзею.
«Нездарма адзін з дакументаў Касцёла – Пастырская канстытуцыя аб Касцёле ў сучасным свеце – носіць назву “Gaudium et spes” (радасць і надзея): моладзь – гэта не толькі радасць, але заўсёды і надзея. Я з вялікай надзеяй і з радасцю гляджу на гэтых людзей – удзельнікаў СДМ», — дадае іерарх.
«Мне ўжо 70 гадоў, але, прыбываючы на СДМ, я сапраўды маладзею, бачачы столькі моладзі. Яна прыехала не на экскурсію ў гістарычны Кракаў, але каб дакрануцца да Бога, каб паглыбіць сваю веру і засведчыць яе перад моладдзю іншых краін.
Мне вельмі спадабалася, як у сваім прывітальным слове да ўдзельнікаў СДМ сказаў Папа Францішак: “Гэты форум моладзі – пілігрымка веры і братэрства”. Так яно і ёсць».
