27 ліпеня 2016 г. папа Францішак прыбыў у Кракаў (Польшча), каб з юнакамі і дзяўчатамі з усяго свету ўзяць удзел у ХХХІ Сусветных днях моладзі на тэму: «Шчаслівыя міласэрныя, бо яны міласэрнасць спазнаюць» (Мц 5, 7).
У горадзе, звязаным з жыццём і служэннем св. Яна Паўла ІІ і св. Фаўстыны Кавальскай, папа Францішак заклікаў моладзь пакінуць у свеце знак, вучачы дарослых «жыць разам у адрозненнях».
Такім чынам мінула ўжо два гады з таго часу, калі польскі Кракаў сабраў сотні тысяч маладых людзей са 187 краін свету, у тым ліку і з Беларусі. Эксклюзіўныя кадры, знятыя аператарамі Ватыканскага тэлецэнтра, дазваляюць сёння нанава перажыць тыя хвалюючыя моманты сустрэчы моладзі са Святым Айцом у год надзвычайнага юбілею міласэрнасці.
У кароткім відэа мы бачым, як адразу пасля прыбыцця Папу радасна вітаюць удзельнікі Дзён моладзі і іх гасцінныя польскія гаспадары. У наступны дзень Святы Айцец наведаў санктуарый Найсвяцейшай Панны Марыі ў Чэнстахове, дзе ў дар Маці Божай прынёс залатую ружу, як перад ім гэта ўжо рабілі бл. Павел VI, св. Ян Павел ІІ і Бэнэдыкт XVI.
На першую сустрэчу з моладдзю папа Францішак прыехаў на трамваі разам з 15-ю дзецьмі-інвалідамі і іх апекунамі. Моцны дождж не змог згасіць запалу і энтузіязму ўдзельнікаў супольнай малітвы на кракаўскім полі Блоні.
Суботні дзень Пантыфік распачаў з наведвання санктуарыя Божай Міласэрнасці ў Лагеўніках, што ў паўднёвай частцы Кракава. Там ён памаліўся перад рэліквіямі св. Фаўстыны Кавальскай, паспавядаў некалькіх маладых людзей, а таксама ўшанаваў рэліквію крыві св. Яна Паўла ІІ.
У гэты дзень папа Францішак паабедаў з кардыналам Дзівішам і трынаццацю маладымі людзьмі, якія ўдзельнічалі ў СДМ у якасці валанцёраў. Увечары ў Кампусе Міласэрнасці на ўскраіне горада Святы Айцец, трымаючыся за рукі з шасцю маладымі людзьмі, прайшоў праз браму Міласэрнасці. Пасля гэтага там былі прадстаўлены сцэнкі на тэму «Езус — крыніца міласэрнасці», якія суправаджаліся сведчаннямі і пытаннямі моладзі.
У апошні дзень СДМ на апошняй св. Імшы з Папам сабраліся больш за паўтара мільёна юнакоў і дзяўчат. Папа паслаў іх у свет як вучняў і сведкаў Божай Міласэрнасці, каб яны абвяшчалі Евангелле Хрыста, ідучы за Ім па жыццёвых шляхах.
Пасля Камуніі Святы Айцец Францішак уручыў маладым людзям лампаду — знак Хрыстовага святла, пасля чаго развітаўся з моладдзю да наступнай сустрэчы на СДМ у Панаме ў 2019 г.
