![](/3/images/news/2022/10/2022-10-12-Mechet_Original.jpg)
У сераду 12 кастрычніка ксёндз канонік Францішак Рудзь наведаў Саборную мячэць у Мінску.
Візіт адбыўся па запрашэнні мусульманскай супольнасці ў Беларусі і па просьбе студэнтаў гістарычнага факультэта БДУ ў межах праекту «Дыялог культур і рэлігій». Гутарку са студэнтамі і экскурсію па Саборнай мячэці правёў імам хатыб Бекір Мурзіч.
Беларускі дзяржаўны ўніверсітэт з’яўляецца ініцыятарам буйнога праекту, скіраванага на духоўна-маральнае выхаванне, нацыянальнае яднанне, спазнанне культурна-рэлігійнай спадчыны вядучых канфесій Рэспублікі Беларусь.
Ксёндз Францішак Рудзь, па благаслаўленні Мітрапаліта Мінска-Магілёўскага арцыбіскупа Юзафа Станеўскага, як прадстаўнік Касцёла неаднаразова браў удзел у мерапрыемствах праекту
Кіраўніцтва і студэнты ўніверсітэта не раз станавіліся гасцямі каталіцкіх парафій. Дарэчы, апошні візіт студэнтаў БДУ адбыўся ў верасні ў касцёл Маці Божай Будслаўскай у Мінску. Выпускнікі гістарычнага факультэта працуюць у сістэмах дзяржаўнага кіравання і адукацыі, сродках масавай інфармацыі, сферы культуры, у якасці кансультантаў і дарадцаў пры дзяржаўных органах і арганізацыях, якія вядуць інфармацыйнае, палітычнае, эканамічнае, культурнае ўзаемадзеянне з замежнымі дзяржавамі.
Таму ў падрыхтоўцы студэнтаў значная ўвага надаецца ведам аб гісторыі рэлігіі і традыцыях вядучых канфесій у нашай краіне, міжканфесійнаму дыялогу, выхаванню талерантнасці і ўменню весці дыялог з прадстаўнікамі розных канфесій падчас прафесійнай дзейнасці. Значны блок навучальных дысцыплін прадстаўлены вывучэннем гісторыі рэлігіі са старажытнасці па найноўшы час.