Пошук

06.10.2022 17:17   Тэкст і фота: Мікола Гракаў / Catholic.by

6 кастрычніка, у першы чацвер ружанцовага месяца, у Мінску адбылася першая пасля летняга перапынку сустрэча духавенства і кансэкраваных асоб, якія нясуць служэнне ў Мінска-Магілёўскай архідыяцэзіі.

Сустрэча сабрала ў мінскім катэдральным касцёле Найсвяцейшага Імя Марыі больш за сотню святароў і сясцёр законных з большасці парафій Мінскай і Магілёўскай вобласці.

Дзень засяроджання распачаўся з супольнай малітвы Літургіі гадзінаў, пасля чаго духоўны айцец святароў Магілёўскага рэгіёна ксёндз канонік Андрэй Далянскі, пробашч парафіі Найсвяцейшай Тройцы ў Касцюковічах, прамовіў аскетычную канферэнцыю.

У ёй святар засяродзіўся на праблеме крызісу ў Касцёле, звярнуўшы ўвагу на ўзаемаадносіны паміж духоўнымі і кансэкраванымі асобамі і праблеме ўдзелу ў розных душпастрыскіх мерапрыемствах на нацыянальным узроўні, а таксама на ўзроўні архідыяцэзіі і дэканатаў.

Ксёндз Андрэй звярнуў увагу на недапушчальнасць у евангелізацыі скрываць або абмяжоўваць праўду з меркаванняў «паліткарэктнасці», перадусім у маральным вымярэнні.

Пасля канферэнцыі адбылася адарацыя Найсвяцейшага Сакрамэнту, а ўсе ахвотныя маглі ў гэты час паяднацца з Богам у сакрамэнце споведзі.

Кульмінацыяй сустрэчы стала святая Імша, цэлебрацыю якой узначаліў Мітрапаліт Мінска-Магілёўскі арцыбіскуп Юзаф Станеўскі.

Разам з ім пры алтары маліліся яго папярэднік на Мінска-Магілёўскай катэдры арцыбіскуп эмэрыт Тадэвуш Кандрусевіч і Генеральныя вікарыі архідыяцэзіі біскуп Юрый Касабуцкі і біскуп Аляксандр Яшэўскі SDB.

У прамоўленай гаміліі арцыбіскуп Станеўскі звярнуў увагу на неабходнасць следаваць за Хрыстом, нягледзячы ні на якія выпрабаванні, з якімі сутыкаюцца ў сваім жыцці і служэнні святары і кансэкраваныя асобы.

Арцыпастыр прывёў у прыклад сваю 90-гадовую цётку, якая моліцца аб тым, каб у цяжкую хвіліну цярпення не адступіць ад Бога і не адрачыся ад Яго, і параіў усім прысутным браць з яе прыклад.

Іерарх звярнуў увагу на прыклады святых, успаміны якіх адзначаліся на працягу тыдня, падкрэсліўшы, што менавіта блізкасць з Хрыстом і давер да Яго дапамаглі ім дасягнуць збаўлення.

Пасля Імшы адбылася арганізацыйная частка сустрэчы, падчас якой арцыбіскуп Юзаф Станеўскі перадусім павіншаваў усіх святароў і законных сясцёр, якія ў мінулыя ад папярэдняй пастырскай сустрэчы месяцы адзначалі імяніны і дні нараджэння.

Перад сабранымі выступілі прадстаўнікі руху сужэнскай духоўнасці Equipes Notre-Dame, якія распавялі пра сваю дзейнасць, скіраваную на ўмацаванне хрысціянскай сям’і і сямейных каштоўнасцяў.

Наступную сустрэчу духавенства і кансэкраваных асоб архідыяцэзіі плануецца правесці ў чацвер 24 лістапада ў парафіі святога Юзафа ў Маладзечне, куды ўсіх гасцінна запрашае пробашч, ксёндз прэлат Эдмунд Даўгіловіч-Навіцкі.

 

Абноўлена 06.10.2022 17:23
Пры выкарыстанні матэрыялаў Catholic.by спасылка абавязковая. Калі ласка, азнаёмцеся з умовамі выкарыстання

. . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . .
Папа Францішак

Спагадлівасць - гэта праява Божай
Міласэрнасці, адзін з сямі дароў Святога Духа