Улетку выйшаў з друку юбілейны 100-ы нумар часопіса «Наша вера» — беларускага культурна-рэлігійнага і гістарычнага каталіцкага выдання, заснаванага ў 1995 годзе.
Часопіс адрасаваны шырокім колам інтэлігенцыі і студэнцкай моладзі, усім, каго хвалююць праблемы духоўнасці, каго цікавіць гісторыя хрысціянства, гісторыя каталіцтва на Беларусі і ў свеце, хто хоча быць у курсе сучаснага рэлігійнага і духоўнага жыцця, яго найбольш значных падзей і найбольш цікавых навінак беларускай і замежнай хрысціянскай літаратуры.
Юбілейны нумар часопіса «Наша вера» пачынаецца словамі віншаванняў Мітрапаліта Мінска-Магілёўскага, арцыбіскупа Юзафа Станеўскага і Старшыні Канферэнцыі Каталіцкіх Біскупаў у Беларусі біскупа Віцебскага Алега Буткевіча, а таксама словам галоўнага рэдактара часопіса Крыстыны Лялько «З нагоды сотага нумара». Тут жа змешчана эсэ-віншаванне адной з пастаянных аўтарак выдання Аксаны Данільчык «Абсалютная радасць пачэснай місіі», якая разважае пра ролю часопіса ў духоўнай прасторы жыцця беларускага грамадства. Юбілейнаму нумару прысвечаны таксама эсэ мастака Андрэя Дубініна «Буйніцы і драбніцы», вершы Ірыны Багдановіч і Дануты Бічэль.
Тэолаг Марына Пашук у рубрыцы «У кантэксце Бібліі» прапануе ўвазе чытачоў артыкул «Чалавек ён прышлы, нетутэйшы», у якім закранае драматычныя праблемы мігрантаў.
Ксёндз Кірыл Бардонаў у артыкуле «Сцвярджэнне несапраўднасці сужэнства…» на прыкладзе цікавага архіўнага матэрыялу разважае пра складанасць гэтай нялёгкай справы для Касцёла і яго вернікаў.
Вядомы рэстаўратар Ігар Сурмачэўскі ў артыкуле «Аздабленне іконы Будслаўскай Багародзіцы ў 1632–1783 гг.» працягвае знаёміць чытачоў са спадчынай Нацыянальнага санктуарыя ў Будславе.
550-годдзю ішкалдскага касцёла прысвечаны артыкул доктара мастацтвазнаўства Тамары Габрусь «Узоры „зімовай готыкі“».
Пра мастака-мемуарыста Эдварда Паўловіча ў эсэ «Кожны дзень зацірае сляды дня пражытага…» піша кандыдат філалагічных навук Язэп Янушкевіч.
Літаратуразнаўца Аляксандр Бразгуноў прапануе ўвазе чытачоў свае перастварэнні выбраных прадмоваў Францішка Скарыны да псальмаў.
У рубрыцы «Проза» друкуецца ўрывак з новай кнігі Аркадзя Шпунта «З нататкаў рэстаўратара», якая рыхтуецца да выдання.
Пра творчасць Антонія Эдварда Адынца ў святле 200-годдзя рамантызму цікава разважае літаратуразнаўца Ірына Багдановіч у артыкуле «Паэт-рамантык і сябра Адама Міцкевіча». Тут жа друкуюцца вершы Антонія Эдварда Адынца ў перакладзе аўтаркі артыкула.
Даследчык літаратуры Язэп Янушкевіч гэтым разам у артыкуле «З роду Палеалогаў…» знаёміць чытачоў з жыццём невядомага паэта і паўстанца Юрыя Ляскарыса. Тут жа друкуюцца яго вершы ў перакладзе на беларускую мову Ірыны Багдановіч.
Памяці таленавітага беларускага паэта Юркі Голуба прысвечана эсэ Мі хася Скоблы «За шклом апостальскае пошты».
Доктар філалагічных навук Людміла Сінькова ў артыкуле «…між Прыродай і Богам…» аналізуе экзістэнцыйную лірыку вядомага беларускага паэта з Польшчы Яна Чыквіна.
У перакладзе на беларускую мову з нямецкай Алены Сямёнавай-Герцаг друкуецца проза нямецкага пісьменніка Георга Освальда Котта.
Гісторык-архівіст Андрэй Шпунт у артыкуле «Каб косткі свае скласці на любай Беларусі» знаёміць чытачоў з яшчэ адной цікавай асобай каталіцкай даўніны — ксяндзом Феліксам Неміровічам-Шчытам.
Мастацтвазнаўца Надзея Усава ў артыкуле «Калекцыі Аляксандра Арлоўскага: падвойнае здабыццё» цікава апавядае пра адметнага і малавядомага мастака-рамантыка пачатку ХІХ ст. Тут жа змешчаны цікавы празаічны абразок Габрыэлі Пузыні «Сын карчмара» пра гэтую легендарную асобу ў перакладзе з польскай мовы Ірыны Багдановіч.
Дырэктар Catholic.by ксёндз доктар Аляксандр Улас ад імя рэдакцыі парталу шчыра віншуе галоўнага рэдактара часопіса «Наша вера» спадарыню Крыстыну Лялько, супрацоўнікаў рэдакцыі і пастаянных аўтараў выдання з выхадам у свет юбілейнага нумара. Няхай Бог шчодра благаславіць плён Вашай працы і натхняе на новыя дасягненні дзеля Яго хвалы, збаўлення душаў і на карысць святому Касцёлу.
