Пошук

23.08.2022 11:01   Тэкст і фота: Кацярына Корабава / Catholic.by

У нядзелю 21 жніўня Мітрапаліт Мінска-Магілёўскі арцыбіскуп Юзаф Станеўскі наведаў парафію святога Андрэя, апостала, у Нарачы (Мінска-Магілёўская архідыяцэзія, Мядзельскі дэканат).

У самай «курортнай» парафіі Беларусі арцыпастыр узначаліў традыцыйны адпуст у гонар святога Роха, які здаўна асаблівым чынам ушаноўваецца ў нарачанскім касцёле, а таксама ўдзяліў сакрамэнт канфірмацыі групе мясцовых вернікаў.

Нарачанцы прывіталі з хлебам-соллю і кветкамі арцыбіскупа Станеўскага ў сваёй святыні, якую ён упершыню наведаў як пастыр Мінска-Магілёўскай архідыяэзіі.

Сакрамэнт хрысціянскай сталасці з рук арцыбіскупа Станеўскага ў гэты дзень прынялі 23 кандыдаты, якія перад гэтым прайшлі належную падрыхтоўку.

З даўніх часоў перад урачыстасцю святога Роха нарачанскія вернікі збіраюцца ў сваёй святыні на Саракагадзіннае набажэнства, каб з падзякай кленчыць перад Езусам у Найсвяцейшым Сакрамэнце, праслаўляючы бязмежную Божую Міласэрнасць і выпрошваючы патрэбныя ласкі для сябе, сваіх блізкіх і ўсёй парафіяльнай сям’і.

Кандыдаты да канфірмацыі добра падрыхтаваліся да таго, каб прыняць у гэтым сакрамэнце дары Духа Святога. Перад гэтым яны прыступілі да сакрамэнту Паяднання, а таксама бралі ўдзел у Сакарагадзінным набажэнстве.

На заканчэнне ўрачыстасці яе ўдзельнікі шчыра падзякавалі арцыбіскупу Юзафу Станеўскаму за сумесную малітву і ўдзелены сакрамэнт канфірмацыі.

 

 

Абноўлена 23.08.2022 11:18
Пры выкарыстанні матэрыялаў Catholic.by спасылка абавязковая. Калі ласка, азнаёмцеся з умовамі выкарыстання

. . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . .
Папа Францішак

Бог заўсёды чакае нас.
Ён ніколі не губляе надзеі і заўсёды прабывае побач.