Папскі пасланнік на 25-годдзе заснавання Мінска-Магілёўскай мітраполіі кардынал Крыстаф Шонбарн OP у суправаджэнні арцыбіскупа Тадэвуша Кандрусевіча 2 ліпеня наведаў мемарыяльны комплекс «Трасцянец».
Разам з паслом Германіі ў Беларусі Петэрам Дэтмарам і паслом Аўстрыі ў Беларусі Берндам Аляксандрам Баерлем каталіцкія іерархі наведалі ўзведзеную ў 2015 годзе на месцы былога лагера смерці скульптуру «Брамы памяці», каля якой прачыталі сумесную малітву.
Таксама дэлегацыі Касцёла і дыпламатычных місій прайшлі ўздоўж алеі з памятнымі знакамі, якія ўвекавечваюць месцы масавага знішчэння людзей на акупаваных тэрыторыях Беларусі ў 1941-44 гг.
Назва «Трасцянец» аб’ядноўвае некалькі месцаў масавага знішчэння людзей, сярод якіх лясны масіў у Благаўшчыне і Шашкаўцы, а таксама лагер смерці побач з вёскай Малы Трасцянец. Малы Трасцянец быў найбуйнейшым лагерам смерці на тэрыторыі Беларусі і акупаваных раёнаў СССР, у якім нацысты знішчылі да 13 тысяч яўрэяў з Аўстрыі. Многія дэпартаваныя былі застрэлены ў лесе Благаўшчыны.
Паводле ацэнак гісторыкаў, у цэлым у Трасцянцы было знішчана больш за 200 тысяч яўрэяў, мірных жыхароў і савецкіх ваеннапалонных...
Пра дэпартацыю ў Беларусь яўрэяў з Аўстрыі, а таксама пра запланаванае пашырэнне мемарыяльнага комплекса «Трасцянец» для гасцей распавяла каардынатар Праграмы падтрымкі Беларусі Федэратыўнай Рэспублікай Германіяй пры Мінскім міжнародным адукацыйным цэнтры імя І. Раў Вольга Рэнш-Ветцэль.
У прыватнасці, было адзначана, што праект па стварэнні мемарыяла «Трасцянец» падтрыманы беларускай дзяржавай і сёння вядуцца захады па будаўніцтву будучага комплекса, які стане вялікім мемарыялам.
«Дзякуй, што вы гэтым займаецеся, — сказаў кардынал. — Памяць пра мінулае — самы моцны напамін».
