3 25 па 29 ліпеня 13 міністрантаў з парафіі святога Арханёла Міхала ў Навагрудку (Гродзенская дыяцэзія) ўзялі ўдзел у рэкалекцыях, якія адбываліся ў рэкалекцыйным доме айцоў кармэлітаў у Мядзелі (Мінска-Магілёўская архідыяцэзія).
Праграма духоўных практыкаванняў для юнакоў уключала ў сябе малітву, адпачынак і навучанне. Кожны дзень хлопцы ўдзельнічалі ў Найсвяцейшай ахвяры святой Імшы, маліліся Ружанец і Вяночак да Божай Міласэрнасці, удзельнічалі ў катэхэзах, а таксама ранішніх і вечаровых малітвах.
На занятках яны паглыбілі свае веды для больш свядомага выканання літургічнай службы пры алтары.
Падчас побыту на Мядзельшчыне навагрудскія міністранты наведалі Нацыянальны санктуарый Маці Божай Будслаўскай, касцёлы ў Параф’янаве (Віцебская дыяцэзія) і Нарачы і правялі набажэнства Крыжовага шляху на мядзельскай Кальварыі — адной з самых старадаўніх у Беларусі.
Акрамя малітваў і літургічных заняткаў, хапала часу і на тое, каб адпачыць не толькі душой, але і целам. Міністранты праводзілі гульні, глядзелі фільмы і купаліся на возеры Мястра.
