Пошук

24.05.2022 11:09   Тэкст: Кс. Юрый Жэгарын / Фота: Марына Валасар / Catholic.by

20–21 мая ў Навагрудку праходзіў першы ў Беларусі Біблійны кангрэс на тэму «Сінадальнасць у Святым Пісанні».

Кангрэс урачыста адкрыў Мітрапаліт Мінска-Магілёўскі арцыбіскуп Юзаф Станеўскі.

Іерарх скіраваў да ўдзельнікаў прывітальнае слова, у якім нагадаў словы святога Гераніма, што «няведання Святога Пісання — гэта няведанне Бога», і зазначыў, што шляхам хрысціяніна з’яўляецца жыццё паводле Божай волі, якая запісана ў Бібліі.

На кангрэсе з дакладамі выступілі выкладчыкі Біблійнай школы «Прафэтэс», біблісты і тэолагі з усёй Беларусі: ксёндз доктар Аляксандр Мацкевіч, ксёндз доктар Сяргей Сурыновіч, доктар Уладзіслаў Валаховіч, доктар Ірына Дубянецкая, ксёндз канонік Юрый Санько, айцец Аркадзь Куляха OCD.

У кангрэсе ўдзельнічала супольнасць Міждыяцэзіяльнай вышэйшай духоўнай семінарыі ў Гродне на чале з адказнымі за фармацыю будучых святароў, а таксама выпускнікі і слухачы Біблійнай школы «Прафэтэс», святары і вернікі парафіі, госці з усёй краіны.

Кангрэс быў, між іншым, прымеркаваны да выпуску навучэнцаў Біблійнай школы «Прафэтэс», якія паўтара гады таму распачалі сваё навучанне ў Навагрудку. На заканчэнне кангрэсу 16 выпускнікоў атрымалі дыпломы з рук арцыбіскупа Станеўскага.

Варта адзначыць, што курс навучання распачалі каля 50 асоб з усіх дыяцэзій Беларусі, аднак праграму адолелі не ўсе. Навучэнцы раз на месяц прыязджалі на лекцыі, якія распачыналіся ў пятніцу, складаліся з сямі акадэмічных гадзін і завяршаліся ў нядзелю. Заняткі праводзілі біблісты, тэолагі, святары і свецкія асобы.

Курс ахопліваў знаёмства з усімі кнігамі Старога і Новага Запавету, з асновамі грэцкай і габрэйскай мовы, біблійнай герменеўтыкі, а таксама экзэгезісу Святога Пісання.

Навучанне заключалася не толькі ў набыцці новых ведаў — важнае месца ў школе было адведзена духоўнасці.

Кожны дзень цэлебравалася святая Імша, адбываліся адарацыі Найсвяцейшага Сакраманту, якія па ініцыятыве саміх навучэнцаў часам праводзіліся і ўначы. Па вечарах за кубкам гарбаты адбываліся таварыскія сустрэчы, на якіх навучэнцы абмяркоўвалі цікавыя актуальныя тэмы з жыцця Касцёла.

Усе лекцыі біблійнай школы запісваліся на відэа, і цяпер плануецца, што ў бліжэйшым будучым з’явіцца поўны біблійны відэакурс, які налічвае больш за сто відэалекцый.

Абноўлена 24.05.2022 11:18
Пры выкарыстанні матэрыялаў Catholic.by спасылка абавязковая. Калі ласка, азнаёмцеся з умовамі выкарыстання

. . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . .
Папа Францішак

Спагадлівасць - гэта праява Божай
Міласэрнасці, адзін з сямі дароў Святога Духа