23 красавіка ў Хрысціянскім сацыяльным цэнтры Дабрачыннай місіі Добрага Самараніна ў Мінску адбылася малітва праслаўлення «Дзеці нясуць міласэрнасць».
Як паведамляе сайт місіі Samaranin.by, гэта быў фестываль духоўных спеваў, дыялог любові, праслаўлення і падзякі Пану Богу. На рэсурсе падкрэсліваецца, што малітоўныя спевы, якія выконвалі дзеткі, гучалі асабліва пранікнёна і кранальна.
Удзел у мерапрыемстве ўзялі дзевяць дзіцячых калектываў з розных мясцін: дзiцячы хор Дабрачыннай місіі Добрага Самараніна пад апекай святой Уршулі Ледухоўскай з Мінска, дзiцячы хор парафii Нараджэння Мацi Божай з Гомеля, дзіцячы хор «Зярняткі» парафіі cвятога Казіміра з Маладзечна, хор «Божыя Ягняткі» з Мінска, гурт «Пухавiцкiя пярлiнкi» з Мар’інай Горкі, дзіцячы хор Transitus парафіі святога Францішка з Мінска, гурт «Нябесныя ноткі» парафіі святога Яна Хрысціцеля з Мінска, гурт Anima парафіі святога Яна Хрысціцеля з Мінска і гурт «Міхаэлькі» з Мінска.
Як лічаць арганізатары, малітва праслаўлення павінна практыкавацца не толькі тады, калі жыццё напоўнена шчасцем і хочацца спяваць, але асабліва ў складаныя моманты.
На іх думку, праслаўляць Бога — гэта як удыхаць чыстае паветра: яно ачышчае душу, дазваляе не заставацца ў няволі складанага моманту і цемры цяжкасцей, дадае сілаў, надзеі і прыносіць сапраўдную радасць.
