16 красавіка, у Вялікую суботу, Мітрапаліт Мінска-Магілёўскі арцыбіскуп Юзаф Станеўскі благаславіў стравы на велікодны стол у шэрагу мінскіх парафій.
Згодна са старадаўняй традыцыяй, у Касцёле прынята благаслаўляць стравы, якія з’яўляюцца неадменным атрыбутам святочнага стала на Пасху.
Вернікі прыносяць у святыню на благаслаўленне хлеб і іншае святочнае печыва на ўспамін хлеба, якім Езус накарміў народ, што слухаў Яго ў пустыні. Акрамя таго, у прыгожа аздобленых і асабліва духмяных пасля посту велікодных кошыках можна ўбачыць кілбасы, вяндліны і іншыя стравы на ўспамін пасхальнага ягняці, а таксама соль, якая захоўвае ежу ад псавання.
Бадай што, самым важным элементам святочнага стала на Вялікдзень у нас з’яўляюцца фарбаваныя яйкі, «пісанкі» — старадаўні сімвал новага жыцця.
Напярэдадні Пасхі арцыбіскуп Станеўскі наведаў пяць сталічных парафій, дзе памаліўся разам з вернікамі пры Грабніцы Пана і благаславіў стравы на велікодны стол.
Увечары іерарх узначаліць у мінскім катэдральным касцёле цэлебрацыю святой Пасхальнай Вігіліі — галоўнай святой Імшы на працягу ўсяго літургічнага года. Прамая трансляцыя ўрачыстага набажэнства будзе весціся на Першым канале Беларускага тэлебачання, а таксама на партале Catholic.by.
Пачатак у 21.45
