29–31 сакавіка ў касцёле святога Арханёла Міхала ў Івянцы прайшла сустрэча міністрантаў з усіх парафій нашай краіны, душпастырства ў якіх вядуць айцы з Ордэна Канвентуальных Францішканаў.
Удзельнікі сустрэчы шукалі адказаў на пытанні пра тое, якія рысы павінен мець сапраўдны міністрант і што павінен умець рабіць для таго, каб літургія, у якой ён выконвае важныя функцыі, не страціла сваю веліч і згранасць.
Дзякуючы івянецкай францішканскай супольнасці і гасціннасці мясцовых парафіянаў удзельнікі маглі адчуць сябе ў Івянцы як дома.
Арганізатары сустрэчы францішкане — ордэн аптымістычны і адкрыты на свет і на дабро, якое пакінуў у ім Створца, таму акрамя канферэнцый і набажэнстваў для міністрантаў былі арганізаваныя спаборніцтвы па футболе і шашках, стральбе з луку і пнеўматыкі, а таксама турнір па настольным тэнісе. Удзельнікі маглі праверыць свае веды па літургіцы і катэхізісу, а таксама навучыцца азам ігры на электрагітары.
Гэтым разам кубак Дэлегата адправіўся ў парафію Беззаганнага Зачацця Найсвяцейшай Панны Марыі ў Удзеле (Віцебская дыяцэзія), аднак праявілі свае веды і здольнасці таксама хлопцы з Гродна, Гальшанаў, Свіслачы і Івянца.
Годным заканчэннем сустрэчы стала Эўхарыстыя, цэлебрацыю якой узначаліў Мітрапаліт Мінска-Магілёўскі арцыбіскуп Юзаф Станеўскі.
У прамоўленай гаміліі іерарх падкрэсліў каштоўнасць міністранцкага служэння. Арцыпастыр нагадаў, што ў перыяд Вялікага посту, які цяпер працягваецца ў Касцёле, Хрыстус асабліва блізкі кожнаму чалавеку, таму кожны можа і павінен шукаць шлях да Яго, а Божая Міласэрнасць дапаможа з гэтага шляху не сыходзіць.
Пераможцы міністранцкага конкурсу атрымалі з рук арцыбіскупа Станеўскага дыпломы і ўзнагароды і вярнуліся ў свае парафіі, каб наступным разам зноў сустрэцца вялікай міністранцкай грамадою.
