26 лютага Канферэнцыя Каталіцкіх Біскупаў у Беларусі скіравала Паведамленне ў сувязі з ваенным канфліктам, які працягваецца ва Украіне.
Дарагія браты і сёстры і ўсе людзі добрай волі!
Кожнаму з нас вядома аб ваенным канфлікце, які працягваецца ва Украіне.
На Генеральнай Аўдыенцыі, якая адбылася 23 лютага ў ватыканскай Зале святога Паўла VI, Святы Айцец Францішак звярнуўся з наступнымі словамі:
«Я адчуваю вялікі боль у сваім сэрцы з прычыны пагаршэння сітуацыі ва Украіне <…> Цяпер я хачу звярнуцца да ўсіх, веруючых і няверуючых. Езус вучыў нас, што на д’ябальскую апантанасць гвалту належыць адказваць Божай зброяй: постам і малітвай.
Запрашаю ўсіх зрабіць 2 сакавіка, Папяльцовую сераду, днём посту дзеля міру. Асабліва заахвочваю вернікаў, каб гэты дзень прысвяцілі руплівай малітве і посту. Няхай Валадарка супакою выратуе свет ад шаленства вайны».
Мы, каталіцкія біскупы Беларусі, далучаемся да просьбы Святога Айца Францішка і просім кожнага чалавека добрай волі, а асабліва веруючых нашага Касцёла, каб гэтая Папяльцовая серада была днём асаблівай малітвы і посту ў інтэнцыі міру, бо «для Бога няма нічога немагчымага» (пар. Лк 1, 37).
На гэтую справу ад усяго сэрца благаслаўляем.
Каталіцкія Біскупы Беларусі
P.S. Святарам належыць прачытаць гэтае паведамленне вернікам у нядзелю 27 лютага.
