У студзені ўбачыў свет 14-ы выпуск зборніка прац па навукова-тэалагічнай праблематыцы Studia Theologica Grodnensia, які выдаецца Гродзенскай дыяцэзіяй.
Выданне Studia Theologica Grodnensia заснавана ў 2007 годзе.
Iніцыятарам рэгулярнага выдання зборніка навуковых артыкулаў — першага такога роду выдання як у Касцёле на Гродзеншчыне, так і ў Касцёле на Беларусі, — стаў біскуп Аляксандр Кашкевіч.
Як паведамляе Grodnensis.by, у сёлетнім выпуску змешчаны публікацыі аўтараў, якія з’яўляюцца вядучымі спецыялістамі ў сваіх галінах навукі.
Нумар адкрывае артыкул вядомага дзеяча ў галіне хрысціянскай духоўнасці і містыкі прафесара Станіслава Урбанскага «Святасць хрысціяніна ў святле апостальскай адгартацыі Gaudete et Exsultate Папы Францішка».
У зборніку публікуюцца таксама навуковыя артыкулы святароў дыяцэзіі.
Так, ксёндз Яўген Амасёнак разважае над малітвай Езуса ў святле традыцыі праваслаўнай духоўнасці, асабліва ў тым, што датычыцца манаства і пустэльніцтва.
Ксёндз доктар Юрый Бяганскі ў артыкуле на літургічна-душпастырскую тэматыку разважае пра ролю маўчання ў літургіі. Аўтар падкрэслівае важнае значэнне і багатую сімволіку маўчання падчас літургічнай цэлебрацыі.
У зборніку змешчаны таксама артыкулы свецкіх вернікаў Гродзенскай дыяцэзіі.
Тыя, хто цікавіцца гісторыяй каталіцкага манаства і, у прыватнасці, Таварыства Езуса, або езуітаў, з цікаўнасцю прачытаюць артыкул доктара Уладзіміра Леўшука, у якім аўтар апісвае і аналізуе найважнейшыя этапы развіцця гродзенскай місіі ад яе заснавання ў 1622 годзе да моманту ліквідацыі ў 1773 годзе.
Выхаваўчая і асветніцкая дзейнасць манаскіх ордэнаў і супольнасцяў у XVI–XVIII стагоддзях на тэрыторыі сённяшняй Гродзеншчыны — прадмет аналізу даследчыцы Вольгі Голуб. Аўтар артыкула падкрэслівае ролю шматлікіх школ і калегій, якімі кіравалі супольнасці езуітаў, дамініканаў, піяраў, бэрнардынаў, францішканаў, кармэлітаў і іншых манаскіх супольнасцяў.
Рэдакцыйная калегія разлічвае, што зборнік знойдзе сваіх чытачоў сярод шматлікіх зацікаўленых асоб i стане заахвочваннем да навуковай актыўнасці ў сферы развіцця тэалагічнай думкі ў мясцовым Касцёле.
Рэдакцыя запрашае да супрацоўніцтва ўсіх, хто жадае падзяліцца з шырокай грамадскасцю набытымі ведамі, вынікамі ўласнага aналізу і навуковых даследаванняў.
Зборнік можна набыць у сакратарыяце Курыі ў Гродне (вул. Карла Маркса, 4).
